गडचिरोली : गडचिरोलीमध्ये एक धक्कादायक घटना घडली आहे. जिल्हाधिकाऱ्यांच्या शासकीय शिखरदीप बंगल्यात सुरक्षा रक्षक म्हणून काम करणाऱ्या राज्य राखीव दलाच्या जवानाने स्वतःच्या डोक्यात गोळी झाडून आत्महत्या केल्याची खळबळजनक घटना घडली आहे. आज १२ फेब्रुवारी रोजी सकाळी साडेअकरा वाजण्याच्या सुमारास ही घटना घडली. यामुळे राज्यात मोठी खळबळ उडाली आहे. उत्तम किसनराव श्रीरामे (३२) असे आत्महत्या केलेल्या जवानाचे नाव आहे.
उत्तम किसनराव श्रीरामे हे मूळचे नांदेड जिल्ह्यातील देगलूर तालुक्यातील रहिवासी आहेत. आत्महत्येपूर्वी त्यांनी ‘ माणूस मरतो पण आत्मा अमर आहे’ असा स्टेटस व्हॉटस्अपला ठेवला होता. श्रीरामे यांचा ३ वर्षांपूर्वीच विवाह झाला होता. राज्य राखीव दलाच्या पुणे येथील गट क्र. १ मध्ये ते सेवा बजावत होते. सध्या ते गडचिरोली जिल्ह्यात जिल्हाधिकारी संजय मीणा यांच्या शासकीय निवासस्थानी शिखरदीप बंगल्यात सुरक्षा रक्षक म्हणून कर्तव्य बजावत होते.
खाटेवर झोपून स्वतःच्या डोक्यात झाडली गोळी
ड्युटी संपल्यावर बंगल्यातीलच विश्रामगृहात खाटेवर झोपून स्वतःच्या डोक्यात बंदुकीतून गोळी झाडून घेतली. गोळीबाराचा आवाज आल्यानंतर इतर सुरक्षा रक्षक धावत आले तेंव्हा ते रक्ताच्या थारोळ्यात पडलेले होते. या घटनेआधी काही वेळापूर्वीच जिल्हाधिकारी संजय मीणा हे सुटीवरून गडचिरोली येथे आपल्या शासकीय बंगल्यात पोहोचले होते.
या घटनेनंतर गडचिरोली पोलिसांसह राज्य राखीव दलाचे अधिकारी जिल्हाधिकाऱ्यांच्या बंगल्यावर दाखल झाले. पोलीस अधीक्षक नीलोत्पल यांनी आत्महत्येचे कारण अस्पष्ट असल्याचे सांगितले असून तपासानंतर कारण स्पष्ट होईल असं ते म्हणाले.
