अमरावती: अमरावती येथे धामणगाव शहरातील (Crime News) दत्तापूर पोलीस ठाण्याच्या हद्दीत घडलेली एक अत्यंत क्रूर घटना समोर आली आहे. एका आईनेच आपल्या अनैतिक प्रेमसंबंधात अडथळा येत असल्याने पोटच्या मुलाची हत्या केली. मात्र, दत्तापूर पोलिसांनी घटनेनंतर केवळ 4 तासांत या खुनाच्या गुन्ह्याचा छडा लावत चारही आरोपींना बेड्या ठोकल्या आहेत.
पोलीस निरीक्षक गिरीश ताथोड यांच्या नेतृत्वाखालील तपास पथकाने ही कौतुकास्पद कामगिरी केली. मृत तरुण गणेश उर्फ शुभम गजानन वारंगणे याचा मृतदेह मिळाल्यानंतर पोलिसांनी तातडीने सूत्रे हलवली. मृताच्या मामाच्या फिर्यादीवरून गुन्हा दाखल करत पोलिसांनी तपास सुरू केला.
अल्प वेळेत पोलिसांनी गणेशची आई दुर्गा वारंगणे, तिचा प्रियकर मनोज किर्तने आणि या कटात सहभागी असलेले अमोल अर्जुने व अशोक चवरे या चारही आरोपींना ताब्यात घेतले. सखोल चौकशीमध्ये त्यांनी गुन्ह्याची कबुल दिली.
आईनेच रचला होता कट
तपासात समोर आलेल्या माहितीनुसार, दुर्गा वारंगणे हिचे मनोज किर्तने याच्यासोबत अनैतिक प्रेमसंबंध होते. गणेश हा त्यांच्या संबंधात अडथळा ठरत होता. यामुळेच दुर्गा आणि मनोज यांनी त्याला संपवण्याचा कट रचला. 7 ऑक्टोबर रोजी सकाळी आरोपींनी गणेशला मोटरसायकलवर बसवून आसेगाव परिसरातील शेतात नेले आणि तिथे निर्दयीपणे मारहाण करून त्याची हत्या केली.
पोलीस अधीक्षक विशाल आनंद, अपर पोलीस अधीक्षक पंकज कुमावत आणि उपविभागीय अधिकारी अशोक थोरात यांच्या मार्गदर्शनाखाली अधिक तपास सुरु आहे.
