अमरावती : अमरावतीमध्ये होळीच्या दिवशी एक मोठा अपघात घडला आहे. अमरावती जिल्ह्यतील चिखदाराजवळ बस दरीत कोसळल्याने भीषण अपघात झाला आहे. या अपघातात तीन जणांचा मृत्यू झाला आहे. तर अनेक प्रवासी जखमी झाल्याची प्राथमिक माहिती मिळत आहे. ही बस परतवाडा सेमाडोह घटांग रस्त्यावरुन जात असताना घाटात वळणाच्या रस्त्यावर चालकाचे नियंत्रण सुटल्याने अपघात झाला आहे.
मिळालेल्या अधिक माहितीनुसार, अमरावतीच्या चिखलदराजवळ ही अपघाताची घटना घडली आहे. प्रवाशांनी भरलेली ही बस परतवाडा सेमाडोह घटांग रस्त्यावरुन जात असताना घाटात वळणाच्या रस्त्यावर चालकाचे नियंत्रण सुटल्याने बस थेट दरीत कोसळली. या अपघातात दोन महिला आणि एक बालक अशा तीन प्रवाशांचा मृत्यू झाला आहे, तर ३६ प्रवासी गंभीर जखमी झाले आहेत.
घटनेची माहिती मिळताच पोलीस घटनास्थळी दाखल झाले असून स्थानिकांनी घटनास्थळी धाव घेत अपघातग्रस्तांना मदत केली. सर्व जखमींना तात्काळ रुग्णालयात दाखल करण्यात आले असून त्यांच्यावर सध्या रुग्णालयात उपचार सुरू आहेत.
