अकोला : अकोल्यातुन एक धक्कादायक घटना समोर येत आहे. भररस्त्यावर एका तरुणावर चाकूहल्ला करण्यात आल्याच्या घटनेने परिसरात एकच खळबळ उडाली आहे. अजित पवार गटाचे आमदार अमोल मिटकरी यांच्या घरापासून काही अंतरावर असलेल्या तोष्णीवाल लेआउट परिसरात ही धक्कादायक घटना घडली. एका तरुणीसाठी दोघांमध्ये हा वाद झाला असल्याची माहिती मिळत आहे. एका तरुणाने गर्लफ्रेंडच्या एक्स बॉयफ्रेंडवर हल्ला केला असून या हल्ल्यामध्ये तरूण गंभीर जखमी झाला आहे. ही संपूर्ण घटना सीसीटीव्हीमध्ये कैद झाली आहे.
मिळालेल्या माहितीनुसार, करण थुकेकर या तरुणांने त्याच्या गर्लफ्रेंडच्या एक्स बॉयफ्रेंडवर भररस्त्यात चाकूने हल्ला केला असून या हल्ल्यामध्ये करण सावळे हा तरुण गंभीर जखमी झाला आहे. दोघेही कृषी नगर भागातील रहिवासी असल्याची माहिती मिळत आहे. गर्लफ्रेंडच्या कारणांवरून हा चाकूहल्ला झाल्याची माहिती समोर आली आहे. जखमी करण सावळे याचे एका तरुणीवर प्रेम होतं. त्यांच्यामध्ये काही कारणास्तव वाद झाले आणि तिने करण सावळेची साथ सोडली. त्यानंतर त्या तरुणीचे आरोपी करण थुकेकर याच्यासोबत प्रेमसंबंध जुळले.
मागे तू वाचला आता तुला दाखवतो..
रविवारी दुपारी दोन वाजताच्या सुमारास जखमी करण सावळे हा त्याचा मित्र शिवा शर्मा याच्यासोबत तोष्णीवाल लेआउट परिसरात जात होता. त्यावेळी आरोपी करण थुकेकर आणि त्याचा मित्र बाईकवर आले. त्यानंतर करण थुकेकरने ‘मागे तू वाचला आता तुला दाखवतो’ म्हणत सोबत आणलेला चाकू काढून करण सावळेवर हल्ला केला. करणने आपल्या गर्लफ्रेंडच्या एक्स बॉयफ्रेंडवर म्हणजेच करण सावळे याच्या डोक्यावर आणि पोटावर चाकूने थेट वार केले.
या हल्ल्यामध्ये करण सावळे कशी तरी करण थुकेकरच्या तावडीतून स्वत:ची सुटका करतो आणि पळ काढतो. आरोपी त्याचा पाठलाग करत पुन्हा त्याच्यावर चाकूहल्ला करत त्याला जखमी करतो. या हल्ल्यात करण सावळे हा गंभीर जखमी झाला असून त्याच्यावर अकोल्याच्या शासकीय रुग्णालयात उपचार सुरू आहेत. घटनेनंतर दोन्हीही आरोपी बाईकवरून पळून गेले होते. पण पोलिसांनी अवघ्या काही तासांत त्यांना ताब्यात घेतले आहे. ही घटना सीसीटीव्हीमध्ये कैद झाली आहे. याप्रकरणाचा पोलिस तपास करत आहे.
