नागपूर : बच्चू कडू यांनी राज्याचे उपमुख्यमंत्री देवेंद्र फडणवीस (Bacchu Kadu On Devendra Fadnavis) यांच्यासह नरेंद्र मोदींवरही (Narendra Modi) निशाणा साधला. “मंत्रिमंडळातील अर्ध्याहून अधिक मंत्री आका आहेत आणि देवेंद्र फडणवीस हे मोठे आका आहेत,” अशी टीका त्यांनी केली.
पंतप्रधान नरेंद्र मोदी हे अडीच वर्षांनंतर मणिपूरला गेले आहेत. मणिपूरमधील हिंसाचारानंतर झालेल्या या दौऱ्यावर प्रहार जनशक्ती पक्षाचे प्रमुख बच्चू कडू यांनी जोरदार टीका केली. “हा दौरा नेपाळच्या घडामोडींचा परिणाम आहे. नरेंद्र मोदींना भीती वाटत आहे की आपलं घर जळू नये. स्वतःच्या घरावर वेळ आली तेव्हाच मणिपूरची आठवण झाली आहे, दुसरं काही नाही,” असे कडू म्हणाले.
पीक विम्याच्या प्रश्नावर भाष्य करताना बच्चू कडू यांनी फडणवीसांवर आणखी टीका केली. “पीक विम्याचे निकष बदलले आहेत. गुजरातमध्ये या कंपन्या फिरकतही नाहीत. शेतकऱ्यांनी पीक विमा काढू नये. या पिक विमा कंपन्या फसव्या आहेत,” असे त्यांनी म्हटले.
ते पुढे म्हणाले, “या देशामध्ये भ्रष्टाचार करण्याची स्पर्धा लागलेली आहे. काही मंत्री फक्त पैसे कमवण्यासाठीच मंत्रीपद घेतात. सर्वांचे मोठे आका म्हणजे देवेंद्र फडणवीस,” असा आरोप त्यांनी केला.
बच्चू कडू हे सध्या शेतकरी–शेतमजूर हक्कयात्रा काढत आहेत. जिल्हानिहाय दौऱ्यादरम्यान ते सत्ताधाऱ्यांवर सतत टीका करत आहेत. शेतकऱ्यांच्या कर्जमुक्तीसह विविध प्रश्नांवर ते आक्रमक झाले आहेत. “शेतकऱ्यांनो, आपण पेटून उठूया.. आपल्या हक्कासाठी लढूया,” असे आवाहन कडू यांनी केले.
