अमरावती : अमरावतीतून एक धक्कादायक घटना समोर आली आहे. अमरावतीमध्ये भरचौकात जुन्या वादातून धारदार चाकूने एकाची हत्या करण्यात आली आहे. या घटनेने अमरावती शहर हादरुन गेले आहे.
गोलू उसरेटे (वय-30) असे मृत तरुणाचे नाव आहे.
मिळालेल्या माहितीनुसार, गोलू उसरेटे हा रात्रीच्या सुमारास चित्रा चौकात मित्रांसोबत फिरायला आला होता. त्यावेळी चौकात चार तरुणांसोबत शुल्लक कारणावरुन त्यांच्यात वाद झाला. त्यावेळी या चौघांनी त्याच्यावर चाकू हल्ला केल्याने गोलूने पळून जाण्याचा प्रयत्न केला. मात्र गोलूचा पाठलाग करुन या चार व्यक्तींनी त्याच्यावर धारदार शस्त्राने सपासप वार केले. त्यामुळे गोलू रक्तबंबाळ झाला. त्यावेळी रक्तबंबाळ अवस्थेत गोलूला रुग्णालयात दाखल केले असता त्याला डॉक्टरांनी मृत घोषीत केले.
दरम्यान, गेल्या काही दिवसांपूर्वीच गोलूने अमरावती शहरात सर्वात मोठी कावड यात्रा काढली होती. त्याच्या हत्येची माहिती मिळताच परिसरात तणावाचे वातावरण निर्माण होऊन अमरावती शहर हादरुन गेले आहे. या प्रकरणाचा पुढील तपास पोलीस करत आहेत.
