अमरावती : भरधाव ट्रकने दुचाकीला धडक दिल्याने झालेल्‍या अपघातात सैनिकाचा जागीच मृत्यू झाला आहे. तर, एक जण जखमी झाला आहे. हा अपघात बुधवारी २८ फेब्रुवारी रोजी दुपारी गाडगेनगर ठाण्याच्या हद्दीतील रहाटगाव चौक परिसरात घडला. अविनाश उईके (२४) रा. गणेशपूर, मोर्शी असे मृत सैनिकाचे नाव आहे.
विशाल तुमडाम (१९) रा. टेंबुरखेडा, वरूड असे जखमीचे नाव आहे. जखमीवर जिल्हा सामान्य रुग्णालयात उपचार सुरू आहेत. अविनाश हा भारतीय सैन्य दलात कार्यरत होता. नुकताच तो सुटीवर घरी आला होता. बुधवारी सकाळी अविनाश हा मित्र विशाल याच्यासह दुचाकी क्रमांक एमएच २७ डीजी ३९४४ ने कामानिमित्त अमरावतीला जात होता. मार्गात रहाटगाव चौक परिसरातील एका हॉटेलजवळ त्याच्या दुचाकीला एका भरधाव ट्रकने धडक दिली.
अपघाताची माहिती मिळताच गाडगेनगर पोलिसांनी घटनास्थळ गाठून पंचनामा केला व जखमी विशालला तातडीने जिल्हा सामान्य रुग्णालयात दाखल केले. त्यानंतर मृतदेह शवविच्छेदनासाठी रुग्णालयात नेण्यात आला. या प्रकरणी पोलिसांनी अज्ञात ट्रक चालकाविरुद्ध गुन्हा दाखल केला असून त्याचा शोध सुरू आहे.
