वर्धा: सोशल मीडियाच्या चकाचक दुनियेत स्वतःची ओळख निर्माण करणाऱ्या तरुणाईचा प्रवास कधी कधी किती भीषण वळणावर संपतो, याचे मन सुन्न करणारे उदाहरण समोर आले आहे. छत्रपती संभाजीनगरमधील प्रसिद्ध रीलस्टार अरुण तुपे याच्या निधनाची घटना ताजी असतानाच, आता वर्ध्यातील अवघ्या 17 वर्षीय काजल रोकडे या ‘रीलस्टार’ तरुणीचा मृतदेह जलाशयात आढळल्याने खळबळ उडाली आहे.
वर्ध्याच्या आर्वी नाका परिसरातील गजानन नगरमध्ये राहणारी काजल रोकडे मंगळवारी घरातून बाहेर पडली, ती पुन्हा परतलीच नाही. चिंतेत असलेल्या कुटुंबीयांनी शोध सुरू केला तेव्हा तिच्या मोबाईलचे लोकेशन सेलू तालुक्यातील रिधोरा येथील पंचधारा जलाशयाजवळ दाखवत होते. कुटुंबीयांनी तिथे धाव घेतली असता, जलाशयाकाठी काजलची पांढऱ्या रंगाची मोपेड, चपला, पर्स आणि मोबाईल बेवारस अवस्थेत सापडले.
बुधवारी दुपारी पोलिसांनी शोधमोहीम राबवली असता काजलचा मृतदेह पाण्यात तरंगताना आढळला. ही घातपात आहे की आत्महत्या? हे अद्याप गूढ आहे. दरम्यान, याप्रकरणी पोलिस अजून तपास करत आहेत.
