नागपूर : जपानी गार्डनजवळ वरिष्ठ पोलीस निरीक्षक विनोद चौधरी (Senior PI Vinod Chaudhary) यांच्या कारचा सोमवारी अपघात (Accident) झाला. एका व्यक्तीने दारुच्या नशेत कार चालवत असताना समोरुन पोलीस निरीक्षकाच्या कारलाच धडक दिली आहे. यावेळी या अपघातामध्ये विनोद चौधरी यांच्या पत्नी किरकोळ जखमी झाल्या आहेत.
वरिष्ठ पोलीस निरीक्षक विनोद चौधरी आणि त्यांच्या पत्नी कारने घरी जात असताना राजभवन चौकाजवळ एका क्वालिसचालकाने दारुच्या नशेत कार विरुद्ध बाजूने आणली. तसेच समोरुन गाडी चालवत येत असताना चौधरी यांच्या कारला धडक दिली.
यात वरिष्ठ पोलीस निरीक्षक विनोद चौधरी यांच्या पत्नीच्या चेह-याला मार लागला आहे. चौधरी यांनी लगेच नियंत्रण कक्षाला या अपघाताची माहिती दिली. गिट्टीखदान पोलीस ठाण्याचे पथक घटनास्थळी पोहोचले होते. या अपघातामध्ये कारचे नुकसान झाले आहे.
