ठाणे : ठाण्यातील मुंब्रामध्ये एक धक्कादायक घटना घडली आहे. 3 वर्षांच्या चिमुकलीवर पाचव्या मजल्यावरुन कुत्रा पडल्याने तिचा दुर्दैवी मृत्यू झाला आहे. या घटनेचं सीसीटीव्ही फुटेजही समोर आलं आहे. या घटनेने परिसरात एकच खळबळ उडाली आहे.
मुंब्रामधील अमृत नगरमध्ये चिराग मेसन इमारतीच्या 5 व्या मजल्यावरुन एक कुत्रा थेट खाली पडला. त्यावेळी 3 वर्षांची मुलगी आपल्या आईसोबत रस्त्याने जात असताना कुत्रा या मुलीच्या अंगावर पडला. या घटनेनंतर मुलीला रुग्णालयात दाखल करण्यात आले. मात्र तिचा यावेळी मृत्यू झाल्याची माहिती समोर आली. या घटनेतील कुत्रा देखील गंभीर जखमी झाला असून त्याला प्राणी रुग्णालयात दाखल करण्यात आले आहे.
नेमका प्रकार काय?
ही दुर्दैवी घटना मंगळवारी दुपारी 2 वाजता घडल्याचं समोर आलं आहे. मुंब्रामधील अमृत नगरमध्ये चिराग मेंशन इमारतीच्या टेरेसवर जैद सय्यद नावाचा व्यक्तीने कुत्रा पाळला होता. 6 ऑगस्ट, मंगळवारी दुपारी हा कुत्रा अचानक पाचव्या मजल्यावरुन खाली कोसळला. यादरम्यान रस्त्यावरुन आईसोबत जाणाऱ्या 3 वर्षांच्या जाणाऱ्या मुलीच्या अंगावर हा कुत्रा पडल्याने ती जागेवरचं बेशुद्ध पडली. यामुळे तिला ताबडतोब डॉक्टरांकडे नेण्यात आलं, परंतु मुलीचा दुदैवी मृत्यू झाला. कुत्रा देखील खाली पडल्यानंतर बेशुद्ध पडला होता. परंतु थोड्यावेळाने कुत्रा जागेवरुन उठल्याचे व्हिडीओमध्ये दिसत आहे.
