ST Workers:मुंबई : एसटी कर्मचाऱ्यांच्या प्रलंबित प्रश्नांवर तोडगा काढण्यासाठी राज्याचे परिवहन मंत्री तसेच एसटी महामंडळाचे अध्यक्ष प्रताप सरनाईक (Pratap Sarnaik) यांनी विधानभवनात महत्त्वाची बैठक घेतली. या बैठकीत विविध कर्मचारी संघटनांनी मांडलेल्या अडचणी आणि मागण्यांवर सविस्तर चर्चा करण्यात आली. या प्रश्नांवर टप्प्याटप्प्याने उपाययोजना करण्यासाठी संबंधित अधिकाऱ्यांना आवश्यक सूचना देण्यात आल्या.
या बैठकीत सेवानिवृत्त एसटी कर्मचाऱ्यांसाठी एक महत्त्वाचा निर्णय जाहीर करण्यात आला. यापुढे निवृत्त कर्मचाऱ्यांना त्यांच्या पत्नीसह वर्षभर मोफत प्रवासाची सुविधा देण्यात येणार असल्याची माहिती मंत्री सरनाईक यांनी दिली. या निर्णयामुळे अनेक निवृत्त कर्मचाऱ्यांना दिलासा मिळणार आहे.
सेवा शक्ती संघर्ष एसटी कर्मचारी संघाने चालक आणि वाहकांवर होणारी कारवाई, आगारातील व्यवस्थापनातील अडचणी तसेच काही प्रशासकीय प्रक्रियांमुळे निर्माण होणाऱ्या समस्या याबाबत मंत्री सरनाईक यांचे लक्ष वेधले होते. या पार्श्वभूमीवर संघटनेचे अध्यक्ष आमदार सदाभाऊ खोत आणि इतर पदाधिकाऱ्यांसोबत सकारात्मक चर्चा झाली.
मंत्री सरनाईक यांनी सांगितले की, कर्मचाऱ्यांना न्याय देणे हीच एसटी महामंडळाची प्राथमिक जबाबदारी आहे. कर्मचारी आणि प्रवाशांच्या हिताचा विचार करूनच निर्णय घेतले जातील, असेही त्यांनी स्पष्ट केले. तसेच एसटी महामंडळाचे काम अधिक पारदर्शक आणि सुटसुटीत करण्यावर भर दिला जाणार असल्याचे त्यांनी सांगितले.
या बैठकीमुळे कर्मचारी वर्गाच्या समस्या सोडवण्यासाठी प्रशासन अधिक सक्रिय होईल, अशी अपेक्षा व्यक्त करण्यात येत आहे.
