School Update : राज्यातील शालेय शिक्षण विभागाने आगामी शैक्षणिक वर्षासाठी काही महत्त्वाचे बदल जाहीर केले आहेत. एप्रिल महिन्यात चालू शैक्षणिक वर्ष (Academic Year) संपणार असून जूनपासून नवीन शैक्षणिक वर्ष सुरू होणार आहे. या पार्श्वभूमीवर विद्यार्थ्यांच्या उन्हाळी सुट्टीबाबतही स्पष्ट माहिती देण्यात आली आहे.
प्राथमिक शिक्षण विभागाने जाहीर केलेल्या माहितीनुसार, राज्यातील शाळांना 2 मे 2026 पासून उन्हाळी सुट्टी लागू होणार आहे. ही सुट्टी 14 जून 2026 पर्यंत राहणार असून 15 जून 2026 पासून नव्या शैक्षणिक वर्षाला सुरुवात होईल. या निर्णयामुळे राज्यातील सर्व शाळांमध्ये एकसमान वेळापत्रक ठेवण्याचा प्रयत्न करण्यात आला आहे.
नवीन शैक्षणिक वर्षात विद्यार्थ्यांच्या आरोग्याचा विचार करून सुरुवातीच्या काही दिवसांत विशेष बदल करण्यात आले आहेत. 15 जून ते 29 जून या कालावधीत शाळा सकाळच्या सत्रात चालवण्यात येणार आहेत. या दरम्यान शाळांची वेळ सकाळी 7.00 ते 11.45 अशी असेल. 30 जून पासून शाळा पुन्हा नियमित वेळेनुसार सुरू करण्यात येतील.
शिक्षण विभागाने स्पष्ट केले आहे की, राज्य मंडळाच्या प्राथमिक, माध्यमिक आणि उच्च माध्यमिक शाळांसाठी हे नियम लागू असतील. इतर मंडळांच्या शाळांनी त्यांच्या वेळापत्रकानुसार निर्णय घ्यावा, असेही सांगण्यात आले आहे. विशेषतः विदर्भातील वाढत्या तापमानाचा विचार करून सकाळच्या सत्राचा निर्णय घेण्यात आला आहे.
या बदलांमुळे विद्यार्थ्यांना उष्णतेपासून दिलासा मिळेल आणि अभ्यासही सुरळीत सुरू राहील, अशी अपेक्षा व्यक्त केली जात आहे. शाळा प्रशासनाने या सूचनांचे पालन करावे, असेही आवाहन करण्यात आले आहे.
