अहमदनगर : अहमदनगर जिल्ह्यातील कोपरगाव शहरात अनैतिक संबंधाच्या संशयावरून तरुणाची हत्या केल्याची धक्कादायक घटना समोर आली आहे. या प्रकरणी सहा जणांवर गुन्हा दाखल करण्यात आला असून तीन जणांना पोलिसांनी ताब्यात घेतले आहे. तर तीन जण फरार झाले आहेत. या घटनेमुळे कोपरगाव शहरात तणावाचं वातावरण असल्याची माहिती पोलिसांनी दिली आहे.
सोहेल हारून पटेल (वय-२८), असं खून करण्यात आलेल्या तरुणाचं नाव आहे. काल (दि. २१) रात्रीच्या सुमारास सोहेल याचे अपहरण करत आरोपींकडून जबर मारहाण केल्याचा आरोप सोहेल पटेलच्या कुटुंबीयांनी केला आहे. दरम्यान, मृत तरूणाच्या नातेवाईकांनी पोलीस ठाण्यासमोर ठिय्या मांडलेला आहे.
नेमकं काय घडल?
आरोपींना मृत सोहेलवर अनैतिक संबंधाचा संशय होता. त्यामुळे त्यांनी सोहेलचं २१ जुलै रोजी रात्री आठ वाजण्याच्या सुमारास अपहरण केलं. त्यानंतर आरोपींनी सोहेलला जबर मारहाण केली. या मारहाणीत सोहेलचा मृत्यू झाला आहे. या घटनेनंतर मृत सोहेलच्या नातेवाईकांनी पोलीस ठाण्यात धाव घेत पोलीस ठाण्यासमोरचं ठाण मांडून बसले आहेत.
आरोपींवर कठोर कारवाई करण्याची मागणी मृताच्या नातेवाईकांनी केली आहे. या प्रकरणी पोलिसांनी सहा जणांवर गुन्हा दाखल केला असून तीन जणांना पकडण्यात पोलिसांना यश आले आहे. तर तीन जण फरार असून त्यांचा पोलीस शोध घेत आहेत.
