नाशिक : नाशिक येथील प्रसिद्ध डॉ. मनीषा जेजूरकर यांच्या मृत्यू प्रकरणात पोलिसांनी मोठी कारवाई केली आहे. डॉ. मनीषा यांना आत्महत्येस प्रवृत्त केल्याप्रकरणी जिल्हा शासकीय रुग्णालयातील मानसोपचार तज्ज्ञ डॉ. नीलेश जेजूरकर चार दिवसांपासून पोलीस कोठडीत आहेत. त्याच प्रकरणातील दुसरी संशयित आरोपी आणि सिव्हिल रुग्णालयाच्या मानसोपचार विभागाच्या प्रमुख डॉ. स्वाती चव्हाण यांनाही पोलिसांनी अटक केली आहे.
डॉ. मनीषा यांच्या बहिणीने दाखल केलेल्या फिर्यादीत डॉ. नीलेश आणि डॉ. स्वाती यांच्यातील कथित विवाहबाह्य संबंध तसेच मानसिक त्रासामुळे मनीषा यांनी आत्महत्या केल्याचा आरोप करण्यात आला आहे. दरम्यान, डॉ. नीलेश यांच्या चार दिवसांच्या पोलीस कोठडीची मुदत आज (दि. 22) संपत असून त्यांना पुन्हा न्यायालयात हजर केले जाणार आहे.
डॉ. मनीषा यांची बहीण रोहिणी वैभव थोरात यांनी पोलिसांत दिलेल्या फिर्यादीत डॉ. स्वाती चव्हाण यांच्याबाबत गंभीर आरोप करण्यात आले आहेत. स्वाती यांनी डॉ. नीलेश यांच्याशी जवळचे संबंध निर्माण केल्याने नीलेश पत्नी मनीषाकडे दुर्लक्ष करू लागले आणि त्यांना मानसिक त्रास देत असल्याचे फिर्यादीत नमूद आहे.
दिवाळीच्या काळात मनीषा आई-वडिलांकडे गेल्या असताना त्यांनी पतीकडून त्रास होत असल्याचे सांगितले होते. त्यानंतर 14 डिसेंबर 2025 रोजी त्यांनी बहिणीला फोन करून पतीचे वागणे बदलले असून ते सतत डॉ. स्वाती यांच्यासोबत राहण्याचा प्रयत्न करत असल्याचे सांगितल्याचा उल्लेख फिर्यादीत आहे.
गंगापूर रोड परिसरात राहणाऱ्या डॉ. नीलेश आणि डॉ. स्वाती यांचे गेल्या दोन वर्षांपासून एकमेकांच्या घरी येणे-जाणे असल्याचाही दावा करण्यात आला आहे. तसेच जानेवारी 2026 मध्ये मनीषा यांनी घरातील वैयक्तिक गोष्टी पती डॉ. स्वाती यांना सांगत असल्याचे बहिणीला सांगितल्याचे फिर्यादीत नमूद आहे. मनीषा यांनी स्वाती यांच्याशी फोनवरून याबाबत विचारणा केली असता, त्यांनी मनीषाला पतीला आता तू आवडत नसल्याचे सांगितल्याचा आरोप आहे.
दरम्यान, 9 एप्रिल 2026 रोजी एका महिला डॉक्टरने दिलेल्या अधिकृत जबाबातून नीलेश यांच्या कथित विवाहबाह्य संबंधांबाबत माहिती मिळाल्याचे सांगण्यात आले आहे. तसेच 5 मार्च रोजी एका लग्नसमारंभात डॉ. मनीषा यांचा सार्वजनिकरित्या अपमान झाल्याचा आरोप आहे. त्यानंतर 6 मार्च रोजी त्यांनी आत्महत्या केली.
या सर्व घटनांच्या पार्श्वभूमीवर डॉ. मनीषा यांनी पतीच्या कथित विवाहबाह्य संबंधांमुळे आणि लग्नसमारंभातील घटनेनंतर हे टोकाचे पाऊल उचलले असावे, असा पोलिसांचा संशय असल्याचे सांगण्यात आले आहे. तसेच हे प्रकरण केवळ आत्महत्येस प्रवृत्त करण्यापुरते मर्यादित आहे की त्यामागे आणखी काही बाबी आहेत, याचाही तपास पोलिसांकडून केला जात आहे.
