अहमदनगर : अहमदनगर शहरातील उड्डाण पुलावरून ट्रक खाली कोसळल्याची घटना घडली आहे. या अपघातात कोणतीही जीवितहानी झाली नसल्याची प्राथमिक माहिती मिळत आहे. ही घटना आज 24 जुलै रोजी दुपारच्या सुमारास घडली आहे.
याबाबत मिळालेल्या प्राथमिक माहिती अशी कि, अहमदनगर शहरात असलेल्या उड्डान पुलावरून आयशर टेम्पो थेट उड्डाण पुलावरील जाळ्या तोडून खाली पडला आहे. दरम्यान, या अपघातात कोणतीही जीवित हानी झालेली नाही, मात्र अत्यंत वर्दळीच्या रोडवर असलेल्या नगर सोलापूर चौकातच हा अपघात झाला आहे. त्यामुळे वाहतूक कोंडी झाली आहे.
याआधीही अनेक वेळा दुचाकी आणि चार चाकी वाहने या उड्डाणपूलावरून खाली कोसळले आहेत. या ठिकाणी मोठे वळण असल्यामुळे वारंवार अपघाताच्या घटना घडत आहेत. हे वळण चुकीचे असल्याचे अनेक वेळा निदर्शनास येऊन देखील राष्ट्रीय महामार्ग प्राधिकरण विभागाने याकडे सपशेल दुर्लक्ष करत आहे. त्यामुळे या ठिकाणी सतत अपघाताच्या घटना घडत आहेत. या अपघातात ड्रायव्हर आणि क्लिनर गंभीर जखमी झाले असून त्यांना रुग्णालयात दाखल करण्यात आले आहे.
