जळगाव: जळगाव शहरात एका नवविवाहितेचा भीषण अपघातात मृत्यू झाल्याची दुर्दैवी घटना घडली आहे. लग्नाला अवघे सहा दिवस झाले असताना माहेरी जात असलेल्या 21 वर्षीय वैशाली भाऊसाहेब पाटील यांचा जागीच मृत्यू झाला. या घटनेमुळे दोन्ही कुटुंबांवर दुःखाचा डोंगर कोसळला असून परिसरात हळहळ व्यक्त होत आहे.
मिळालेल्या माहितीनुसार, वैशाली यांचा विवाह 7 जुलै रोजी मोठ्या उत्साहात पार पडला होता. लग्नानंतरचे धार्मिक विधी पूर्ण झाल्यानंतर त्या सोमवारी आपल्या काकांसोबत दुचाकीवरून माहेरी निघाल्या होत्या. जळगाव शहरातील कवयित्री बहिणाबाई चौधरी महाराष्ट्र विद्यापीठासमोरील रस्त्यावरून जात असताना भरधाव वेगाने आलेल्या एका चारचाकी वाहनाने त्यांच्या दुचाकीला जोरदार धडक दिली.
या अपघातात वैशाली यांचा घटनास्थळीच मृत्यू झाला. तर त्यांचे काका रावसाहेब पाटील गंभीर जखमी झाले असून त्यांच्यावर रुग्णालयात उपचार सुरू आहेत. अपघाताची माहिती मिळताच माहेर आणि सासरच्या नातेवाईकांनी रुग्णालयात धाव घेतली. काही दिवसांपूर्वीच आनंदात लग्न झालेल्या मुलीचा मृतदेह पाहून कुटुंबीयांना मोठा धक्का बसला. रुग्णालय परिसरात नातेवाईकांनी केलेला आक्रोश पाहून उपस्थितांनाही अश्रू अनावर झाले.
दरम्यान, अपघातानंतर चारचाकी वाहनाचा चालक घटनास्थळावरून फरार झाला. या प्रकरणी पोलिसांनी अज्ञात वाहनचालकाविरुद्ध गुन्हा दाखल केला असून त्याचा शोध सुरू आहे. परिसरातील सीसीटीव्ही फुटेज तपासले जात असून प्रत्यक्षदर्शींचीही चौकशी केली जात आहे. या घटनेमुळे रस्ते सुरक्षेचा प्रश्न पुन्हा एकदा ऐरणीवर आला असून भरधाव वाहनांवर कठोर कारवाई करण्याची मागणी नागरिकांकडून होत आहे.
