नाशिक: महिलांचे लैंगिक शोषण आणि आर्थिक फसवणूक (Ashok Kharat) प्रकरणात अडकलेल्या अशोक खरात याच्याबाबत रोज नवे धक्कादायक तपशील समोर येत आहेत. एसआयटीकडून चौकशी सुरू असताना (Nashik News) त्याच्या फरार पत्नीचा शोधही सुरू आहे. याच दरम्यान त्याच्या सासरच्या गावातून समोर आलेली माहिती या प्रकरणाला (Sinnar News) नवे वळण देणारी ठरत आहे. (Latest Marathi News)
सिन्नर तालुक्यातील पाडळी या सुमारे 1700 लोकसंख्येच्या गावात खरातची सासुरवाडी आहे. त्याच्या अटकेनंतर गावकऱ्यांनी तीव्र संताप व्यक्त करत लग्नावेळचा एक धक्कादायक किस्सा उघड केला आहे. 1992-93 च्या सुमारास खरातचा विवाह कल्पना यांच्याशी झाला होता. मात्र त्यावेळीही अनेक गोष्टी संशयास्पद असल्याचे ग्रामस्थ सांगतात.
एका स्थानिकाने दिलेल्या माहितीनुसार, खरातचे वय जास्त असल्याने सुरुवातीला या लग्नाला घरच्यांचा आणि भावाचा विरोध होता. तरीही हे लग्न कसे पार पडले, याबाबत आजही प्रश्नचिन्ह कायम आहे. मात्र सर्वात धक्कादायक बाब म्हणजे लग्नाच्या हळदीच्या कार्यक्रमात घडलेली घटना.
हळदीदरम्यान खरातने अंगावरील कपडे काढण्यास स्पष्ट नकार दिला होता. उपस्थितांनी आग्रह केल्यानंतर जेव्हा त्याने कपडे काढले, तेव्हा त्याच्या शरीरावर शस्त्राने झालेल्या जुन्या जखमांचे ठसे स्पष्ट दिसत होते. हा प्रकार पाहून उपस्थित पाहुणेही हादरले होते. त्या घटनेने त्यावेळीच संशय निर्माण झाला होता, असे ग्रामस्थांचे म्हणणे आहे.
दरम्यान, खरातच्या आर्थिक व्यवहारांबाबतही तपास यंत्रणा सखोल चौकशी करत आहेत. गावकऱ्यांकडून मिळणारी माहिती आणि भूतकाळातील घटना तपासाला महत्त्वाचे धागेदोरे देऊ शकतात, अशी चर्चा सध्या सुरू आहे.
