जळगाव : राष्ट्रवादी काँग्रेस शरदचंद्र पवार पक्षाचे प्रमुख शरद पवार यांच्या ताफ्यातील गाड्यांचा भीषण अपघात झाला. पवारांच्या ताफ्यातील दोन वाहने एकमेकांवर आदळून हा अपघात झाला. जळगाव जिल्ह्यातील यावल तालुक्यात हा अपघात झाला.
सध्या लोकसभा निवडणुकांचे वातावरण असल्याने अनेक प्रचारसभांचा धडाका सुरु आहे. त्यातच शरद पवार हे जळगाव जिल्ह्याच्या दौऱ्यावर आहेत. चोपडा येथील सभा आटोपून ते भुसावळकडे जात होते. नेमकं याचदरम्यान हा अपघात झाला. या अपघातात कोणीही जखमी झाले नाही. मात्र, गाडीचे मोठ्या प्रमाणात नुकसान झाले आहे.
दरम्यान, पवारांच्या ताफ्यातील वाहने भुसावळकडे जात असताना त्यांच्या वाहनाच्या समोर गतिरोधक आले होते. वाहनचालकाने गाडीचा स्पीड कमी केला. मात्र, मागील येणाऱ्या वाहनांना याचा अंदाज न आल्याने ताफ्यातील शेवटी येत असलेल्या एका वाहनाने समोरील वाहनास धडक दिली. त्यामुळे हा अपघात झाला.
