बुलढाणा: बुलढाण्यात पोलिसांच्या हलगर्जीपणामुळे एका व्यक्तीचा जीव गेल्याची घटना घडली आहे. येथे पुतण्याने काकाच्या डोक्यात कुऱ्हाड घालून खून केल्याची घटना घडली आहे. गोपाल मनोहर बोके (वय 45) असं मृत व्यक्तिचं नाव असून शुभम विठ्ठल बोके असं आरोपीचं नाव आहे.

मिळालेल्या माहितीनुसार, बुलढाणा जिल्ह्यातील नांदुरा तालुक्यातील सोनज या गावी पुतण्याने काका गोपाल मनोहर बोकेंना, शुक्रवारी (28 मार्च) जुन्या वादातून मारहाण केली होती. पुतण्याने मारहाण केल्यानंतर काका गोपाल बोके यांनी नांदुरा पोलिस ठाण्यात तक्रारही दिली होती. मात्र त्यानंतरही पोलिसांनी कुठली कारवाई केली नव्हती. दुसऱ्या दिवशी शनिवारी सकाळी पुतण्याने तक्रारदार काकाची डोक्यात कुऱ्हाड घालून हत्या केली.
हत्येला पोलिस जबाबदार…
पोलिसांनी कुठलीही कारवाई न केल्यामुळे गोपाल बोके यांची हत्या झाली असल्याचा आरोप मृतकाच्या कुटुंबीयांनी केला आहे. जर पोलिसांनी मृत मनोहर यांनी केलेल्या तक्रारीची दखल घेतली असती आणि कारवाई केली असती तर ही वेळच आली नसती असा आरोप मृतकाच्या पत्नीने केला आहे. या हत्येला केवळ पोलिस जबाबदार असल्याचा आरोप मृतकाच्या मुलांनी केला आहे.








