नाशिक : जुन्या नाशकातील कुंभारवाड्यात अज्ञातांकडून सात वाहनांची जाळपोळ करण्यात आली आहे. पाच दुचाकी, एक छोटा हत्ती आणि एक हातगाडी अशा सात गाड्यांचे जाळपोळीत मोठ्या प्रमाणावर नुकसान झाले आहे. याप्रकरणी पोलिसांनी अज्ञात समाजकंटकांविरुद्ध गुन्हा दाखल केला आहे. या घटनेनंतर परिसरात घबराटीचे वातावरण पसरले आहे.
परिसरातील लोकांना आगीची माहिती मिळताच विझविण्यासाठी घरातील पाण्याचा वापर नागरिकांनी केला. मात्र, वाहनेजळून खाक झाली आहेत. या घटनेमुळे जुन्या नाशकातील नागरिकांकडून संताप व्यक्त करण्यात आला आहे. अशा समाजकंटकांविरुद्ध पोलिसांनी कठोर कारवाई करावी, अशी मागणी अनेक नागरिकांनी केली आहे. यापूर्वी देखील भद्रकाली हद्दीतील चौक मंडई परिसरातील बिरबल आखाडा भागात वाहनांची तोडफोड करण्याचा प्रकार घडला होता. तसेच शहरातील इतर भागांमध्ये वाहनांची जाळपोळ करण्याचे प्रकार घडत असल्याने नागरिकांनी याबद्दल नाराजी व्यक्त केली आहे.
