Nashik Accident : नाशिक : नाशिक जिल्ह्यातील दिंडोरी तालुक्यात शुक्रवारी रात्री भीषण अपघात झाला असून कार विहिरीत कोसळून 9 जणांचा मृत्यू झाल्याची दुर्दैवी घटना घडली आहे. या अपघातामुळे संपूर्ण परिसरात शोककळा पसरली आहे. मृतांमध्ये एकाच कुटुंबातील 5 जणांचा समावेश असल्याची माहिती समोर आली आहे. Nashik Accident
मिळालेल्या माहितीनुसार, ही घटना रात्री सुमारे 10 वाजण्याच्या सुमारास दिंडोरी शहरातील शिवाजीनगर परिसरात घडली. एमएच 15 जेएस 1053 क्रमांकाची कार जात असताना चालकाचे नियंत्रण सुटले. त्यानंतर कार रस्त्याच्या कडेला असलेल्या शेतातील उघड्या विहिरीत कोसळली. विहिरीत पाणी असल्याने कार थेट खोलवर गेली.
घटनेची माहिती मिळताच स्थानिक नागरिक आणि पोलीस घटनास्थळी पोहोचले. मात्र अंधार आणि विहिरीतील चिखल यामुळे बचावकार्य करताना मोठ्या अडचणी आल्या. त्यानंतर क्रेन आणि इतर यंत्रसामग्रीच्या मदतीने कार बाहेर काढण्याचे काम सुरू करण्यात आले. मध्यरात्री सुमारे 1 वाजता कार विहिरीतून बाहेर काढण्यात आली आणि त्यातील सर्व 9 मृतदेह बाहेर काढण्यात आले.
या अपघातात मृत्यू झालेल्यांमध्ये इंदोरे गावातील रहिवासी असल्याचे समोर आले आहे. सुनील दत्तू दरगोडे, राखी सुनील दरगोडे, उषा अनिल दरगोडे, श्रद्धा अनिल दरगोडे आणि श्रावणी अनिल दरगोडे अशी काही मृतांची नावे समोर आली आहेत. उर्वरित 4 मृतांची ओळख पटवण्याचे काम सुरू आहे.
या दुर्घटनेमुळे इंदोरे गावावर दुःखाचा डोंगर कोसळला आहे. या प्रकरणाचा पुढील तपास पोलीस करत आहेत.
