अहमदनगर : खासदार निलेश लंके यांचे पीए राहुल झावरे यांच्यावर जीवघेणा हल्ला झाला असून ते गंभीर जखमी झाल्याची माहिती समोर आली आहे.
अहमदनगर दक्षिणमधून निलेश लंके हे लोकसभा निवडणुकीत विजयी झाले. त्यांच्या या विजयाला अवघे दोन दिवसही उलटत नाहीत तोच त्यांच्या पीएवर जीवघेणा हल्ला झाला आहे. या हल्ल्यात गंभीररित्या जखमी झालेल्या राहुल झावरे यांच्यावर खासगी रुग्णालयात उपचार सुरू आहेत. लवकरच नगर येथे त्यांना हलवण्यात येणार आहे.
या घटनेबाबत मिळालेल्या माहितीनुसार, अहमदनगरचे नवनिर्वाचित खासदार निलेश लंके यांचे स्विय सहाय्यक राहुल झावरे यांच्यावर सुजय विखे समर्थक विजय औटी यांच्यासह 7 ते 8 जणांनी मिळून हल्ला केल्याची माहिती समोर आली आहे.
यावेळी राहुल झावरे यांच्या कारची देखील तोडफोड करत त्यांना बेदम मारहाण करण्यात आलं. या मारहाणीत झावरे हे गंभीररित्या जखमी झाले आहे. त्यांना उपचारासाठी रुग्णालयात दाखल करण्यात आले आहे. पोलिस याप्रकरणाचा पुढील तपास करत आहेत.
