नाशिक: भोंदूबाबा म्हणून चर्चेत असलेल्या अशोक खरात प्रकरणात न्यायालयीन कारवाई सुरूच आहे. आर्थिक गैरव्यवहार, फसवणूक आणि महिलांवरील लैंगिक अत्याचाराशी संबंधित गंभीर आरोप असलेल्या अशोक खरातच्या न्यायालयीन कोठडीत वाढ करण्यात आली आहे. या प्रकरणाची पुढील सुनावणी 30 सप्टेंबर 2026 रोजी होणार आहे.
ईडीने दाखल केलेल्या सुमारे 3000 पानी आरोपपत्राची न्यायालयाने दखल घेतल्यानंतर सर्व संबंधित आरोपींना समन्स बजावण्यात आले होते. त्यानुसार अशोक खरातची पत्नी कल्पना खरात 22 सप्टेंबर रोजी विशेष न्यायालयात हजर झाली. यावेळी तिने जामिनासाठी अर्ज केला. न्यायालयाने तिला 1 लाख रुपयांच्या जातमुचलक्यावर सशर्त जामीन मंजूर केला. तसेच तिच्यावर परदेशात जाण्यास बंदी घालण्यात आली आहे.
दरम्यान, अशोक खरातला नाशिकरोड कारागृहातून व्हिडिओ कॉन्फरन्सिंगद्वारे न्यायालयासमोर हजर करण्यात आले. सुनावणीदरम्यान त्याची न्यायालयीन कोठडी वाढवण्याचा निर्णय घेण्यात आला. आता पुढील सुनावणी 30 सप्टेंबरला होणार आहे.
पोलिसांच्या नोंदीनुसार, अशोक खरातविरोधात नाशिकसह सिन्नर, शिर्डी आणि राहता परिसरात एकूण 17 गुन्हे दाखल असल्याची माहिती आहे. ईडीच्या तपासानुसार, त्याच्यावर दैवी शक्ती आणि भविष्यवाणीच्या नावाखाली लोकांची फसवणूक केल्याचे तसेच महिलांवर लैंगिक अत्याचार केल्याचे आरोप आहेत.
ईडीने केलेल्या तपासात आर्थिक व्यवहारांबाबतही अनेक गंभीर बाबी समोर आल्याचा दावा आरोपपत्रात करण्यात आला आहे. तपास यंत्रणेच्या म्हणण्यानुसार, तब्बल 142 बेनामी खात्यांमधून मोठ्या प्रमाणात आर्थिक व्यवहार करण्यात आले. या पैशांचा वापर कथितपणे रिअल इस्टेट आणि महागड्या मालमत्तांमध्ये गुंतवणुकीसाठी करण्यात आल्याचा आरोप आहे.
मात्र या सर्व आरोपांबाबत न्यायालयीन प्रक्रिया अद्याप सुरू असून, प्रकरणातील आरोप सिद्ध होणे बाकी आहे. पुढील सुनावणीत या प्रकरणातील कायदेशीर घडामोडींवर लक्ष राहणार आहे.
