नाशिक : पाकिस्तानमध्ये उत्पादित किंवा तेथून निर्यात होणाऱ्या वस्तूंच्या भारतातील आयातीवर केंद्र सरकारने बंदी घातली असतानाही तिसऱ्या देशामार्गे पाकिस्तानी माल भारतात आणण्याचा प्रयत्न झाल्याचे समोर आले आहे. महसूल गुप्तचर संचालनालयाने (DRI) ‘ऑपरेशन डीप मॅनिफेस्ट’ अंतर्गत नाशिकमध्ये कारवाई करत सुक्या खजुराने भरलेले १३ कंटेनर अडवले आहेत. या कंटेनरमध्ये ३६२ मेट्रिक टनांहून अधिक सुका खजूर असल्याचे तपासात समोर आले आहे.
मिळालेल्या गुप्त माहितीनंतर DRIच्या अधिकाऱ्यांनी नाशिकमधील अंबड येथील कंटेनर फ्रेट स्टेशनवर (CFS) ही कारवाई केली. मुंबईतील एका कंपनीने आयात केलेल्या सुक्या खजुराचे हे कंटेनर तपासणीसाठी थांबवण्यात आले. तपासणीदरम्यान या मालाचे मूळ पाकिस्तान असल्याचे आढळून आल्याचे DRIकडून सांगण्यात आले आहे.
अर्थ मंत्रालयाच्या माहितीनुसार, हा माल पाकिस्तानातील कराची बंदरातून जहाजाद्वारे संयुक्त अरब अमिरातीतील जेबेल अली बंदरात पाठवण्यात आला होता. त्यानंतर हा माल दुसऱ्या कंटेनरमध्ये भरण्यात आल्याचा प्राथमिक तपासात निष्कर्ष आहे. भारतात आयात करताना कागदपत्रांमध्ये मात्र या मालाचा उगम संयुक्त अरब अमिराती असल्याचे दाखवण्यात आल्याचा संशय आहे.
पाकिस्तानमधील माल असल्याची बाब लपवून तिसऱ्या देशातून आयात केल्याचे भासवण्यासाठी कागदपत्रांमध्ये फेरफार करण्यात आल्याचा तपास यंत्रणांचा संशय आहे. पाकिस्तानी नागरिकांकडून चालवल्या जाणाऱ्या काही कंपन्यांच्या माध्यमातून हा माल भारतात पाठवण्यात आला असण्याची शक्यताही तपासली जात आहे.
पाकिस्तानमधून भारतात वस्तूंची आयात करण्यावर बंदी असताना त्याचा मार्ग चुकवून माल भारतात आणण्याचा प्रयत्न झाल्याने या कारवाईला महत्त्व प्राप्त झाले आहे. या प्रकरणातून मालाचा मूळ देश लपवून तो दुसऱ्या देशातून आयात झाल्याचे दाखवण्याच्या पद्धतीचा तपास यंत्रणांकडून केला जात आहे.
DRI आणि कस्टम विभागाकडून या प्रकरणातील इतर संबंधित व्यक्ती, कंपन्या आणि व्यवहारांचा तपास सुरू असून, या कथित रॅकेटमधील आणखी कोणते दुवे आहेत, याचा शोध घेतला जात आहे.
