नंदुरबार: जिल्ह्यातील शहादा तालुक्यात भरवस्तीत मंगळवारी सकाळी बिबट्या शिरल्याने एकच धावपळ उडाली. शहरातील अतिशय वर्दळीचा परिसर मानल्या जाणाऱ्या डोंगरगाव रोडवरील पटेल रेसिडेन्सीमागे असणाऱ्या आदित्या हॉस्पिटलमध्ये बिबट्या शिरला. त्यामुळे रुग्णालयातील कर्मचारी भयभीत झाले.
हॉस्पिटलमधील एका सफाई कर्मचाऱ्याला बिबट्या दिसल्यानंतर रुग्णालयातील मागच्या भागात त्याला अडकवून ठेवण्यात प्रशासनाला यश आले. यानंतर रुग्णालय प्रशासनाने तत्परता दाखवत रुग्णालयातील बाकीची प्रवेशद्वारे बंद करुन बिबट्याला एकाच बंद केले. या घटनेबाबत पोलीस आणि वनविभाग यांना माहिती मिळाल्यानंतर ते घटनास्थळी दाखल होत त्यांनी बिबट्याला जेरबंद करण्यासाठी प्रयत्न सुरु केले. सुमारे तीन तासाच्या प्रयत्नानंतर बिबट्याला कुठलेही बेशुद्धीचे इंजेक्शन न देता पिंजऱ्यात अडकविण्यात यश आले.
