नाशिक : नाशिक जिल्ह्यातील दिंडोरी-म्हसरुळ रस्त्यावर मोटारसायकल आणि पिकअपमध्ये भीषण अपघात झाला आहे. या अपघातात पाच जणांचा जागीच मृत्यू झाला आहे. अपघात इतका भीषण होता की, दुचाकीवरील लोक रस्त्याच्या बाजूला उडून पडले होते. या अपघातानंतर रस्त्यावर मोठी वाहतूक कोंडी झाली होती.
या अपघाताबाबत मिळालेली माहिती अशी की, नाशिक जिल्ह्यातील दिंडोरी- म्हसरूळ रस्त्यावर दुपारी दुचाकी आणि पिकअप गाडीचा भीषण अपघात झाला. आरोग्य विज्ञान विद्यापीठाच्या पुढे काही अंतरावर असलेल्या जानोरी फाट्यावर इंडियन ऑइल पेट्रोल पंपाजवळ दुचाकी आणि पिकअपची धडक झाली. या धडकेत पाच जण जागीच ठार झाले आहेत. तर काही जण जखमी झाल्याची माहिती मिळत आहे.
हा अपघात नेमका कसा झाला याबाबत माहिती अद्याप मिळू शकलेली नाही. अपघाताची माहिती पोलिसांना दिल्यानंतर पोलीस घटनास्थळी दाखल झाले आहेत. अपघातमध्ये बोलेरो गाडीचा चक्काचूर झाला आहे. घटनास्थळी अक्षरशः रक्ताचा सडा पडलेला दिसत होता. अपघातातील मृत्युमुखी पडलेल्या व्यक्तींची ओळख पटवण्याचे काम सुरू आहे. तर जखमींना उपचारासाठी रुग्णालयात दाखल करण्यात येत आहे.
