अहमदनगर : जिल्ह्यातल्या पारनेर तालुक्यातील निघोज-वडगाव रस्त्यावर एका हॉटेल जत्राच्या मालकावर एका टोळक्याकडून तलवारीने हल्ला केल्याची धक्कदायक घटना घडली आहे. या घटनेनं संपूर्ण जिल्हा हादरून गेला आहे. या हल्ल्यात गणेश भुकन, प्रवीण भुकन यांच्यासह हॉटेलमधील कर्मचारीही गंभीर जखमी झाले आहेत. ही घटना मंगळवारी (दि. ०२) रात्री बारा वाजण्याच्या सुमारास घडली. ही धक्कादायक प्रकार हॉटेलच्या सीसीटीव्ही कॅमेऱ्यामध्ये कैद झाला आहे.
याबाबत अधिक माहिती अशी कि, निघोज -वडगाव रस्त्यावर ‘जत्रा’ या नावाने हॉटेल आहे. हॉटेलच्या बिलावरून चार ते पाच जणांच्या टोळक्यानं मालकावर तलवारीनं जीवघेणा हल्ला चढवला. या हल्ल्यात हॉटेल मालकासह इतर कर्मचारी गंभीर जखमी झाले आहेत. जखमींना नगरच्या खासगी रुग्णालयात उपचारासाठी दाखल करण्यात आले असून काहींची प्रकृती अत्यंत चिंताजनक असल्याची माहिती मिळत आहे.
या घटनेत परिसरात मोठी खळबळ पसरली आहे. या प्रकरणी पारनेर पोलिस ठाण्यात गुन्हा दाखल करण्यात आला आहे. दरम्यान, हा हल्ला नेमका कुणी आणि कशासाठी केला? याबाबत अद्याप कोणतीही माहिती समोर आलेली नाही. पारनेर पोलीस या घटनेचा पुढील तपास करत आहेत.
