अहमदनगर : अहमदनगर जिल्ह्यात मोठा अपघात घडला आहे. कल्याण-नगर महामार्गावर एसटी बस, कार आणि ट्रॅक्टरचा भीषण अपघात झाला आहे. या अपघातात सहा जणांचा जागीच मृत्यू झाला असून अनेकजण जखमी झाल्याची प्राथमिक माहिती आहे. २३ जानेवारीला मध्यरात्री अडीज वाजण्याच्या सुमारास ही घटना घडली आहे. जखमींना तातडीने उपचारासाठी रुग्णालयात दाखल करण्यात आलं आहे.
पोलिसांनी दिलेल्या माहितीनुसार, ठाणे-मेहकर एसटी बस, उसाचा ट्रॅक्टर आणि इको कार यांच्यात अहमदनगर जिल्ह्यातील ढवळापूर फाट्यानजीक मध्यरात्री अपघात झाला आहे. अपघात इतका भयंकर होता, की यामध्ये तिन्ही वाहनांचा चक्काचूर झाला आहे. या भीषण अपघातात ६ जणांचा जागीच मृत्यू झाला आहे.
दरम्यान, अपघाताची माहिती मिळताच पोलिसांसह परिसरातील नागरिकांनी घटनास्थळी धाव घेत जखमींना प्राथामिक उपचारासाठी पारनेर येथील रुग्णालयात दाखल करण्यात आलं आहे. अपघातातील काही व्यक्तींची प्रकृती चिंताजनक असल्याने त्यांना अहमदनगर येथील शासकीय रुग्णालयात उपचारासाठी दाखल करण्यात आलं आहे. अपघातात मृत्युमुखी पडलेल्या व्यक्तींची नावे अद्याप समोर आली नाही. पोलिसांकडून मृतांची ओळख पटवणे सुरू आहे.
