मुक्ताईनगर : अज्ञात वाहनाने दुचाकीला धडक दिल्यानंतर झालेल्या अपघातात मुक्ताईनगर तालुक्यातील निमखेडी येथील दाम्पत्य मृत्युमुखी पडले. खामखेडा पुलाजवळ हा अपघात झाला. या अपघातात सुभाष रामराव घोडकी (वय 41) आणि सोनुबाई सुभाष घोडकी (वय 34, रा.निमखेडी, ता. मुक्ताईनगर) या दाम्पत्याचा मृत्यू झाला.
निमखेडी खुर्द येथील घोडकी दाम्पत्य नातेवाईक रुग्णास पाहण्यासाठी गेले होते. मात्र, परतीच्या प्रवासात पूर्णा नदीजवळील खामखेडा पुलाजवळ अज्ञात वाहनाने त्यांच्या दुचाकीला जोरदार धडक दिली. या अपघातात दाम्पत्याचा मृत्यू झाला. हा अपघात दुपारी साडेतीन ते चारच्या सुमारास झाला.
दरम्यान, सुभाष घोडकी यांच्या वडिलांचा काही वर्षांपूर्वीच मृत्यू झाला होता. घोडकी यांच्या पश्चात वयोवृद्ध आई आणि दोन मुले आहेत. अपघातात हे दाम्पत्य मृत्युमुखी पडल्याने गावात शोककळा पसरली.
