जळगाव : विधानसभा निवडणुकीमध्ये महायुतीला दणदणीत विजय मिळाला तर महाविकास आघाडीचा दारूण पराभव झाला. राष्ट्रवादी शरदचंद्र पवार पक्षाला या निवडणुकीमध्ये अपेक्षित यश मिळालं नाही. शरद पवार गटाचे केवळ 10 आमदार निवडून आले आहेत. असं असताना निवडणूक झाल्यानंतर खान्देशातील बडा नेता आता शरद पवारांच्या पक्षाला निरोप देणार असल्याच्या तयारीत आहे. जळगावातील राष्ट्रवादी शरदचंद्र पवार पक्षाचे नेते, माजी मंत्री गुलाबराव देवकर हे अजित पवार गटात प्रवेश करणार आहेत. जवळपास 5 हजार पेक्षा जास्त कार्यकर्ते आणि पदाधिकारी हे गुलाबराव देवकर यांच्यासोबत अजित पवार गटात प्रवेश करणार असल्याची माहिती समोर येत आहे.
गुलाबराव देवकर अजित पवार गटात प्रवेशास सज्ज..
माजी मंत्री, जळगावातील राष्ट्रवादी शरद पवार गटाचे नेते गुलाबराव देवकर हे अजित पवार गटात प्रवेश करणार आहेत. अजित पवार गटाचे प्रदेशाध्यक्ष सुनील तटकरे यांची देवकर यांनी भेट घेतली असून सोमवारी ते अजित पवार यांची भेट घेणार आहेत. अजित पवार यांच्या भेटीनंतर प्रवेश सोहळा कधी आणि कुठे घ्यायचा याबद्दलचा निर्णय होणार आहे, अशी माहिती गुलाबराव देवकर यांनी दिली आहे.
नेमकं काय म्हणाले गुलाबराव देवकर?
देवकर म्हणाले की, चिंतन बैठकीमध्ये कार्यकर्त्यांनी सत्तेत जायचा अविचार मांडला. त्यानुसार अजित पवार गटात जाण्याबद्दल निर्णय घेतला. कार्यकर्त्यांच्या सूचनेनुसार अजित पवार गटात प्रवेश करत आहे. जळगाव ग्रामीण मतदारसंघातले तसेच जिल्ह्यातले अनेक राष्ट्रवादी शरद पवार गटाचे पदाधिकारी तसेच कार्यकर्ते हे अजित पवार गटात प्रवेश करणार आहेत, असं गुलाबराव देवकर यांनी सांगितले.
विधानसभा निवडणुकीत शरद पवार पक्षाला पराभवाचा धक्का पचवत नाही, तोच जळगाव जिल्ह्यात गुलाबराव देवकर यांच्यासह अनेक कार्यकर्ते अजित पवार गटात जाणार आहेत. त्यामुळे राष्ट्रवादी शरद पवार गटासाठी हा मोठा धक्का मानला जात आहे. तर आगामी दुसरीकडे स्थानिक स्वराज्य संस्थांच्या निवडणुकांमध्ये जळगाव जिल्ह्यात राष्ट्रवादी अजित पवार गटाला मोठं बळ मिळणार आहे.
