Ashok Kharat : शिर्डी पोलिसांनी समता पतसंस्थेतील संशयित खात्यांच्या चौकशीसाठी महिला आयोगाच्या माजी अध्यक्ष रुपाली चाकणकर यांच्या बहिणी व जाऊ प्रतिभा चाकणकर यांना नोटीस बजावली आहे. त्यांना 5 दिवसांत शिर्डीत हजर राहून जबाब नोंदवण्यास सांगण्यात आले आहे. (Ashok Kharat)
भोंदू अशोक खरात विरोधात शिर्डीत सावकारीचा गुन्हा दाखल असून त्याच्या तपासादरम्यान राहाता येथील समता पतसंस्थेच्या शाखेत अनेक संशयित खाती आढळली आहेत. या खात्यांमध्ये कोट्यवधी रुपयांचे व्यवहार झाल्याचे समोर आले आहे. संबंधित खात्यांमध्ये खरात वारसदार असल्याची नोंद असल्याने पोलिसांकडून खातेदारांची चौकशी सुरू आहे. आतापर्यंत 33 जणांचे जबाब नोंदवण्यात आले असून त्यामध्ये आता प्रतिभा चाकणकर यांना चौकशीसाठी बोलावण्यात आले आहे.
दरम्यान, अशोक खरात आणि त्याच्या 2 सहकाऱ्यांविरुद्ध श्रीरामपूर पोलीस ठाण्यात पत्रकाराला धमकावल्याचा गुन्हा दाखल करण्यात आला आहे. पत्रकार दत्तात्रय खेमनर यांनी दिलेल्या तक्रारीनुसार, खरातने त्यांच्यावर खोटे गुन्हे दाखल करण्याचा प्रयत्न केला तसेच वारंवार धमक्या दिल्याचा आरोप आहे.
या प्रकरणाशी संबंधित कारवाईत अंमलबजावणी संचालनालयाने अशोक खरातची 3 बँक खाती आणि त्याची पत्नी कल्पना खरात हिचे 1 खाते सील केले आहे. या खात्यांमधील मागील 3 वर्षांतील व्यवहारांची तपासणी करण्यात आली आहे.
याचदरम्यान, पुणे जिल्ह्यातील बारामती येथे अघोरी पूजा करून फसवणूक केल्याच्या प्रकरणात एका भोंदू व्यक्तीला न्यायालयाने 4 वर्षे सक्तमजुरी आणि 15000 दंडाची शिक्षा सुनावली आहे.
