धुळे : धुळे शहरात एक भीषण अपघात घडला आहे. एका ट्रक चालकाने चार चाकी वाहनाला धडक दिली. या धडकेत धुळे जिल्ह्यातील रहिवाशी आणि मुंबईत कार्यरत असलेले तरुण पत्रकार हर्षल भदाणे पाटील यांचा जागीच मृत्यू झाला आहे. तर इतर तीन जण जखमी झाले आहेत.
धुळे शहरापासून काही किलोमीटर अंतरावर हा अपघात झाला. ट्रकवरील नियंत्रण सुटलेल्या चालकाने काही वाहनांना चिरडले. ही घटना एवढी भीषण होती की, भरधाव ट्रकने चिरडलेल्या वाहनास जवळपास अर्धा ते एक किलोमीटरपर्यंत फरफटत नेले. यावेळी परिसरातील नागरिकांनी ट्रकचा पाठलाग केला. त्यामुळे बिथरलेल्या ट्रक चालकाने आणखी दोन वाहनांना उडवले.
या घटनेची माहिती मिळताच धुळे शहर पोलीसांनी सदर ट्रक चालक आणि त्याच्या एका सहका-याला ताब्यात घेतले आहे. सध्या पोलीसांकडून या प्रकरणाचा तपास सुरु आहे. या घटनेमुळे धुळे शहरासह जिल्ह्यात एकच खळबळ उडाली आहे.
