नाशिक : शहापूर तालुक्यातील नवीन कसारा घाटात भीषण अपघात झाल्याची घटना घडली आहे. नाशिकहून मुंबईच्या दिशेने जाणाऱ्या कंटेनर चालकाचा ताबा सुटल्याने कंटेनर थेट कसारा घाटातील खोल दरीत कोसळला. या घटनेत कंटेनरमधून प्रवास करणारे पाच जणांचा मृत्यू झाला असून तिघांचे मृतदेह बाहेर काढण्यात यश आले आहे.
अन्य दोघांचे मृतदेह बाहेर काढण्याचं काम सुरू आहे. या घटनेत एका लहान मुलाचाही समावेश असल्याची माहिती मिळत आहे. श्लोक जायभाय (वय-9, रा. नालासोपारा), अक्षय गुगे (वय-30, रा . नवीमुंबई ), अनिकेत वाघ (वय-21 रा .सिन्नर) या तिघांचे मृतदेह बाहेर काढण्यात आले आहेत.
याबाबत मिळालेल्या माहितीनुसार, नवीन कसारा घाटातील बलगर पाॅईटजवळ हा अपघात घडला आहे. कंटेनर पाच प्रवाशांना घेऊन नाशिकहून मुंबईच्या दिशेने निघाला होता. दरम्यान कसारा घाटात आल्यानंतर घाट रस्त्यावर उतार असल्याने कंटेनर चालकाचा ताबा सुटला आणि कंटेनर थेट खोल दरीत कोसळला. या घटनेत कंटेनरमधील ५ ही जणांचा मृत्यू झाला असून यामध्ये एका ९ वर्षीय मुलाचा मृत्यू झाला आहे.
या घटनेची माहिती मिळताच पोलीस व आपत्ती व्यवस्थापन टीम घटनास्थळी दाखल झाले असून मदतकार्य सुरु केले आहे. आतापर्यंत तीन जणांचे मृतदेह बाहेर काढण्यात यश आलं असून दोघांचे मृतदेह बाहेर काढण्याचे प्रयत्न सुरू आहेत.
