नाशिक: नाशिक शहरातील बजरंगवाडी भागात एक अत्यंत दुर्दैवी आणि संतापजनक घटना समोर आली आहे. एका 21 वर्षांच्या पतीने आपल्या 19 वर्षांच्या पत्नीचा अमानुष मारहाण करून जीव घेतल्याचे उघड झाले आहे. घराची किल्ली सापडत नव्हती, या अगदी क्षुल्लक कारणावरून हा संपूर्ण प्रकार घडला. आरोपी तरुणाचे नाव इद्रीस मोहम्मद शेख असे असून पोलिसांनी त्याच्याविरोधात गुन्हा नोंदवला आहे.
पोलीस सूत्रांनी दिलेल्या माहितीनुसार, मृत महिलेचे नाव जरीना उर्फ नन्नी इद्रीश शेख असे होते. काही दिवसांपूर्वी हे दाम्पत्य वडाळा गावात गेले असता तिथेही दोघांमध्ये किरकोळ कारणावरून भांडण झाले होते. त्यावेळी इद्रीसने पत्नीला मारहाण केली आणि माहेरच्या नातेवाईकांनी समजावण्याचा प्रयत्न केला असता, मध्ये पडणाऱ्यांना गंभीर परिणाम भोगावे लागतील अशी धमकीही त्याने दिली होती.
या घटनेनंतर दोघेही आपल्या बजरंगवाडी येथील घरी परतले. मात्र सोमवारी रात्री पुन्हा एकदा घराची चावी न सापडल्याच्या कारणावरून वाद उफाळला आणि इद्रीसने पत्नीला बेदम मारहाण करण्यास सुरुवात केली. जरीनाचा आक्रोश ऐकून आजूबाजूचे रहिवासी धावत आले. घरात प्रवेश केल्यानंतर त्यांना जरीनाच्या तोंडातून आणि डोक्यातून रक्तस्राव होत असल्याचे दिसले. शेजाऱ्यांनी तत्काळ हस्तक्षेप करून तिची सुटका केली, परंतु जखमा इतक्या गंभीर होत्या की उपचार मिळण्याआधीच तिचा मृत्यू झाला.
या घटनेमुळे नाशिक परिसरात संतापाची लाट उसळली असून नागरिकांमध्ये तीव्र प्रतिक्रिया उमटत आहेत. पोलिसांनी आरोपी पतीविरोधात हत्येचा गुन्हा दाखल करून पुढील तपास सुरू केला आहे.
