कोल्हापूर : आरटीई प्रवेश प्रक्रियेअंतर्गत खासगी शाळांना दिल्या जाणाऱ्या 25 टक्के प्रवेशप्रतिपूर्ती अनुदानाच्या वितरणात कथित आर्थिक अनियमितता झाल्याप्रकरणी राज्य सरकारने मोठी कारवाई केली आहे. प्राथमिक शिक्षणाधिकारी मीना शेंडकर यांना निलंबित करण्याचा निर्णय शालेय शिक्षण व क्रीडा विभागाने घेतला आहे. 3 नोव्हेंबर 2026 रोजी यासंदर्भातील अधिकृत आदेश जारी करण्यात आला.
शेंडकर यांनी यापूर्वी कोल्हापूर जिल्हा परिषदेच्या प्राथमिक शिक्षण विभागात शिक्षणाधिकारी म्हणून जबाबदारी सांभाळली होती. सध्या त्या पुण्यातील शिक्षण आयुक्तालयात कार्यरत आहेत. त्यांच्या कोल्हापुरातील कार्यकाळात प्रशासकीय कामकाजाबाबत अनेक तक्रारी करण्यात आल्या होत्या. त्यामुळे या निलंबनाच्या कारवाईनंतर जुन्या तक्रारींचाही विषय पुन्हा चर्चेत आला आहे.
आरटीई कायद्यानुसार खासगी शाळांमध्ये आर्थिकदृष्ट्या दुर्बल आणि वंचित घटकांतील विद्यार्थ्यांसाठी 25 टक्के जागा राखीव ठेवल्या जातात. या जागांवर प्रवेश घेतलेल्या विद्यार्थ्यांच्या शुल्काची भरपाई सरकारकडून संबंधित शाळांना अनुदानाच्या माध्यमातून केली जाते. मात्र, 2022-23 आणि 2023-24 या शैक्षणिक वर्षांत पात्रतेपेक्षा जास्त अनुदान दिल्याचे प्राथमिक तपासात निदर्शनास आल्याचे आदेशात नमूद करण्यात आले आहे. या प्रकरणात निधी वितरणातील दिरंगाई आणि आर्थिक अनियमिततेचे मुद्देही समोर आले आहेत.
महाराष्ट्र नागरी सेवा (शिस्त व अपील) नियम 1979 मधील नियम 4 (1) (अ) नुसार ही कारवाई करण्यात आली आहे. शालेय शिक्षण विभागाचे उपसचिव मो. बा. ताशिलदार यांनी निलंबनाचे आदेश काढले आहेत. पुढील आदेश मिळेपर्यंत शेंडकर निलंबित राहतील. या काळात त्यांचे मुख्यालय पुण्यातील शिक्षण आयुक्तालयात असेल. शासनाची परवानगी घेतल्याशिवाय त्यांना मुख्यालय सोडता येणार नाही. तसेच खासगी नोकरी किंवा व्यवसाय करण्यासही बंदी घालण्यात आली आहे.
दरम्यान, कोल्हापुरातील त्यांच्या कामकाजावर यापूर्वी लोकप्रतिनिधींनीही प्रश्न उपस्थित केले होते. पालकमंत्री प्रकाश आबिटकर यांनी त्यांच्या कामकाजाची चौकशी करण्याचे निर्देश दिले होते. मुख्याध्यापक आणि केंद्रप्रमुखांच्या पदोन्नती प्रक्रियेत अनियमितता झाल्याचे आरोपही जिल्हा परिषदेच्या सभेत करण्यात आले होते. आता आरटीई अनुदान प्रकरणातील निलंबनामुळे शिक्षण विभागातील कारभार पुन्हा चर्चेत आला आहे. चौकशी पूर्ण झाल्यानंतर पुढील काय निर्णय घेतला जातो, याकडे लक्ष लागले आहे.
