लोणी काळभोर, ता. 23 : लोणी काळभोर (ता. हवेली) येथील बाजार मैदानातील भाजी मंडईत महिलांमध्ये वादाचे पर्यवसान धक्काबुक्की, मारहाण आणि शिवीगाळीत झाल्याची घटना मंगळवारी (ता. 22 सप्टेंबर) सकाळी साडेदहाच्या सुमारास घडली आहे. सार्वजनिक ठिकाणी एकमेकींना धक्काबुक्की करून हाताने मारहाण करत दंगा केल्याप्रकरणी तीन महिलांविरुद्ध लोणी काळभोर पोलिस ठाण्यात गुन्हा दाखल करण्यात आला आहे.
जयश्री सुनील देसर्डा (वय 50), ज्योती तेजस देसर्डा (वय 29 ) आणि मीरा रामप्रसाद मंत्री (वय 52, सर्व रा. पालखीस्थळ, लोणी स्टेशन, लोणी काळभोर) अशी गुन्हा दाखल करण्यात आलेल्या महिलांची नावे आहेत. या प्रकरणी महिला पोलीस हवालदार कविता संपत साळवे यांनी सरकारतर्फे लोणी काळभोर पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, लोणी काळभोर येथील बाजार मैदानात संबंधित तिन्ही महिला एकमेकींशी वाद घालत असल्याचे पोलिसांच्या निदर्शनास आले. वाद वाढल्यानंतर तिघींनी एकमेकींना धक्काबुक्की केली तसेच हाताने मारहाण आणि शिवीगाळ केली आहे. त्यामुळे परिसरात काही काळ गोंधळाचे वातावरण निर्माण झाले. या घटनेची माहिती मिळाल्यानंतर पोलिसांनी कारवाई करत तिन्ही महिलांविरुद्ध कायदेशीर कार्यवाही केली.
याप्रकरणी तिन्ही महिलांच्या विरोधात लोणी काळभोर पोलिस ठाण्यात भारतीय न्याय संहितेच्या कलम 194 (2) नुसार गुन्हा दाखल करण्यात आला आहे. पुढील तपास लोणी काळभोर पोलिस ठाण्याचे वरिष्ठ पोलिस निरीक्षक प्रदीप पवार यांच्या मार्गदर्शनखाली पोलिस हवालदार संजय शिंदे करत आहेत.
