पुणे : पुण्यात भरधाव डंपरने दुचाकीला दिलेल्या धडकेत एका 20 वर्षीय आयटी इंजिनिअर तरुणाचा जागीच मृत्यू झाला, तर त्याचा मित्र गंभीर जखमी झाला आहे. ही दुर्दैवी घटना महंमदवाडी भागातील रेहेजा विस्टा परिसरात सायंकाळी सुमारे 5 वाजता घडली आहे . या अपघातानंतर परिसरात तीव्र संताप व्यक्त केला जात आहे.
मिळालेल्या माहितीनुसार, हमजा इब्राहिम सरकार (वय 20) असे अपघातात प्राण गमावलेल्या तरुण आयटी इंजिनिअरचे नाव आहे. तर त्याचा सोबती केस वसीम खान (वय 20) हा गंभीर जखमी झाला असून त्याच्यावर सध्या रुग्णालयात वैद्यकीय उपचार सुरू आहेत. हे दोघेही तरुण दुचाकीवरून जात असताना मागून येणाऱ्या एका वेगवान डंपरने त्यांना जोरात धडक दिली. धडक इतकी जोरदार होती की, दुचाकी थेट डंपरच्या मागील चाकाखाली गेली. चाकाखाली चिरडल्यामुळे हमजाचा रुग्णालयात पोहोचवण्यापूर्वीच मृत्यू झाला.
या प्रकरणी कोंढवा पोलिसांनी तत्परतेने कारवाई करत अपघातास कारणीभूत ठरलेला डंपर जप्त केला आहे. तसेच डंपर चालक भागण्णा लक्ष्मण कटबू (वय 34) याच्याविरुद्ध गुन्हा नोंदवून त्याला अटक केली आहे.
दरम्यान, या घटनेनंतर स्थानिक नागरिकांमध्ये तीव्र असंतोष पसरला. परिसरातील वाढत्या वाहतूक समस्यांकडे आणि निष्काळजीपणे गाड्या चालवणाऱ्या चालकांवर कारवाई करण्याकडे प्रशासनाचे लक्ष वेधण्यासाठी स्थानिकांनी रस्त्यावर उतरून ‘रस्तारोको’ आंदोलन केले. वारंवार होणाऱ्या अशा अपघातांवर आळा घालण्यासाठी प्रशासनाने कठोर पावले उचलावीत, अशी मागणी रहिवाशांनी केली आहे
