डॉ. अशोक बालगुडे
मुंबई : महाराष्ट्राच्या राजकारणात एका वाक्याने किती मोठे वादळ उठू शकते, याचा प्रत्यय पुन्हा आला! राष्ट्रवादी काँग्रेसचे नेते प्रफुल्ल पटेल यांनी ज्येष्ठ नेते शरद पवार यांची भेट घेतली. या वेळी पवारांनी ‘10 तारखेनंतर बसू’, असे म्हटल्याने राजकीय वर्तुळात तर्कवितर्कांना उधाण आले आहे.
दोन्ही राष्ट्रवादी काँग्रेस पुन्हा एकत्र येणार? नव्या राजकीय समीकरणांची जुळवाजुळव सुरू आहे? की या भेटीमागे आणखी काही राजकीय संकेत आहेत? प्रश्नांची मालिका सुरू झाली; मात्र उत्तरांची चावी अद्याप पवारांकडेच!
शरद पवारांचे राजकारण म्हणजे उघड पुस्तक नव्हे. त्यांच्या पुढील खेळीचा अंदाज बांधताना भल्याभल्या राजकीय जाणकारांची गणिते चुकली आहेत. त्यांच्या मनात काय सुरू आहे, याची चाहूल शेजारच्यालाही लागू न देण्याची त्यांची राजकीय हातोटी सर्वश्रुत आहे.
पटेलांच्या भेटीला नेमका कोणता राजकीय अर्थ आहे, हे 10 तारखेनंतरच स्पष्ट होईल. तोपर्यंत चर्चांचे फड रंगतील आणि राजकीय पंडितांचे अंदाजही धावत राहतील!
पवारांनी पत्ते उघडलेले नाहीत; पण राजकीय पटावर उत्सुकतेची सोंगटी मात्र पुढे सरकली आहे!
