मालेगाव : दुष्काळाने होरपळत असलेल्या मालेगाव शहरात गुन्हेगारीचे प्रमाण वाढले आहे. वाढत्या गुन्हेगारीमुळे नागरिक त्रस्त झाले असून शहरातील रोजगार देखील मंदावला आहे. मंदीचे सावट शहरावर पसरले असतांना शहरात चोरीच्या घटनांमध्ये देखील वाढ झाली आहे. येथील सायने शिवारात असलेल्या एका कंपनीच्या गोडाउनमधून अज्ञात चोरट्यांनी तब्बल साडेअकरा लाख रुपये किंमतीच्या १०८ सुताच्या बँगची चोरी करुन नेल्याचा प्रकार उघड झाला आहे. याप्रकरणी मालेगाव तालुका पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे. येथील व्यावसायिक अमोल द्वारकादास तापडीया (वय ४६, रा. मालेगाव कॅम्प) यांनी दिलेल्या फिर्यादीवरुन मालेगाव तालुका पोलिसांनी अज्ञात चोरट्यांविरोधात गुन्हा दाखल केला आहे.
दरम्यान, फिर्यादीच्या मालकीच्या तापडीया इंटरप्रायजेस इंडिया प्रा.लि. या गोडाऊनमधून अज्ञात चोरट्यांनी गुरुवार (दि. २३) ते शनिवार (दि.२५) या दरम्यान ११ लाख ५२ हजार ९६४ रुपये किंमतीच्या सुताच्या १०८ बॅगची चोरी केल्याचे लक्ष आले. याबाबत तापडीया यांनी तात्काळ मालेगाव तालुका पोलीस ठाण्यात जावून अज्ञात चोरट्यांविरोधात फिर्याद दिली आहे. पोलिसांनी गुन्हा दाखल करुन घेतला असून याप्रकरणाचा पोलीस निरीक्षक राहुल खताळ तपास करीत आहेत.
