पुणे : दहीहंडी कार्यक्रमासाठी पोलिसांनी परवानगी नाकारल्यानंतरही लावणीचा कार्यक्रम आयोजित केल्याप्रकरणी प्रसिद्ध लावणी नृत्यांगणा राधा पाटील यांच्यासह मंडळाचे अध्यक्ष आणि आयोजकाविरुद्ध बिबवेवाडी पोलिसांनी गुन्हा दाखल केला आहे. कार्यक्रमात अश्लील नृत्य सादर होऊ नये, यासाठी कलाकारांनी रंगभूमी प्रयोग परिनिरीक्षण मंडळाचे आवश्यक प्रमाणपत्र सादर करणे बंधनकारक करण्यात आले होते. मात्र, संबंधितांकडून आवश्यक कागदपत्रे सादर करण्यात आली नसल्याने पोलिसांनी कार्यक्रमाला परवानगी नाकारली होती.
लावणी नृत्यांगणा राधा पाटील (रा. मुंबई), एम्पायर ग्रुप ए के बॉइजचे अध्यक्ष भूषण अभिमान सोनवणे (रा. अंबामाता मंदिराजवळ, सुखसागरनगर, कात्रज) आणि आयोजक अमोल काटे (रा. कात्रज) अशी गुन्हा दाखल झालेल्यांची नावे आहेत. राधा पाटील यांची लावणी नृत्यांगणा म्हणून महाराष्ट्रात मोठी लोकप्रियता असून, विविध कार्यक्रमांसाठी त्यांना राज्यभरातून आमंत्रित केले जाते.
याप्रकरणी पोलीस हवालदार नंदलाल हरिचंद्र भादले यांनी बिबवेवाडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, दहीहंडी उत्सवानिमित्त एम्पायर ग्रुप ए के बॉइजचे अध्यक्ष भूषण सोनवणे यांनी राधा पाटील यांच्या लावणी कार्यक्रमाचे आयोजन केले होते. या कार्यक्रमासाठी परवानगी मिळावी, यासाठी बिबवेवाडी पोलीस ठाण्यात अर्ज करण्यात आला होता.
दरम्यान, महाराष्ट्रातील कला, लोककला, चित्रपट आणि सांस्कृतिक कार्यक्रमांसंदर्भात रंगभूमी प्रयोग परिनिरीक्षण मंडळाच्या नियमांनुसार आवश्यक कागदपत्रे आणि प्रमाणपत्रे सादर करण्याबाबत पोलिसांना सूचना देण्यात आल्या होत्या. त्यानुसार भूषण सोनवणे यांना कार्यक्रमासाठी आवश्यक कागदपत्रे विहित नमुन्यात सादर करण्यास सांगण्यात आले होते.
मात्र, मंडळाचे अध्यक्ष, आयोजक आणि प्रत्यक्ष कार्यक्रम सादर करणाऱ्या राधा पाटील यांच्याकडून आवश्यक प्राधिकृत कागदपत्रे किंवा प्रमाणपत्रे सादर करण्यात आली नाहीत. त्यामुळे बिबवेवाडी पोलिसांनी कार्यक्रमाची परवानगी नाकारली होती. असे असतानाही कार्यक्रम आयोजित करण्यात आल्याने पोलिसांनी संबंधित तिघांविरुद्ध गुन्हा दाखल केला असून, या प्रकरणाचा पुढील तपास सुरू आहे.
