जालना : महाविकास आघाडीसोबत जागावाटपाची बोलणी फिस्कटल्यानंतर आता वंचित बहुजन आघाडीचे अध्यक्ष प्रकाश आंबेडकरांनी राज्यात तिसऱ्या आघाडी तयार करण्याबाबत हालचाली सुरु केल्या आहेत. त्याचाच एक भाग म्हणून त्यांनी मराठा आंदोलक मनोज जरांगें पाटील यांना सामाजिक युतीचा प्रस्ताव दिला आहे. आंबेडकरांच्या प्रस्तावावर येत्या 30 मार्चनंतर आपण निर्णय घेणार असल्याचे मनोज जरांगे यांनी सांगितले.
जालना लोकसभा मनोज जरांगे यांनी लढवावी, असे प्रकाश आंबेडकरांनी सुचवले आहे. त्यावर प्रतिक्रिया देताना मनोज जरांगे म्हणाले की, आंबेडकरांनी दिलेला प्रस्ताव हा चांगला आहे. परंतु, मी राज्यातील कोणत्याही मतदारसंघातून निवडणूक लढवणार नाही. राजकारणात जायचे नाही, हा आपला निर्णय आहे. मराठा आरक्षणासाठी समाजाने जे ठरवले तेवढंच करणार असल्याचे जरांगे यांनी म्हटले आहे.
पुढे बोलताना मनोज जरांगे म्हणाले की, काही लोकांचा आग्रह होता की, 7 मे रोजी ऐकलं नाही, यावेळी आपण राजकारणात जाऊ. पण त्यावर मराठा समाजाने निर्णय घ्यायचा आहे. मी त्यांना सांगितले की, प्रत्येक गावामध्ये जाऊन आपण निवडणुकीत जायचं का? एकच उमेदवार द्यायचा का? हे दोनच प्रश्न विचारा. त्यानंतर जे काही उत्तर आपल्याला मिळेल त्यावर निर्णय घेऊ, असं जरांगे म्हणाले.
प्रकाश आंबेडकरांशी युती करणार का? या प्रश्नावर मनोज जरांगे म्हणाले की, येत्या 30 तारखेनंतर काहीही होऊ शकतं. सामाजिक आंदोलनाचे अंग वेगळं असतं आणि राजकारण पूर्णपणे वेगळं असते. समाजकारण करताना फक्त एकमत असतं, राजकारण करताना बहुमताची गरज असते, असं जरांगे यांनी स्पष्ट केले.
