बीड : राज्यात विधानसभा निवडणुकांसाठी मतदान पार पडत आहे. अशातच बीड विधानसभा मतदारसंघातून एक धक्कादायक बातमी समोर आली आहे. बीड विधानसभा मतदारसंघाचे अपक्ष उमेदवार बाळासाहेब शिंदे यांचा मतदान केंद्रावरच हृदयविकाराच्या तीव्र झटक्याने मृत्यू झाला आहे. या घटनेने एकच खळबळ उडाली असून हळहळ व्यक्त केली जात आहे.
बाळासाहेब शिंदे हे बीड विधानसभा मतदारसंघातून अपक्ष निवडणूक लढवत होते. ते बीड शहरातील छत्रपती शाहू विद्यालयात असणाऱ्या मतदान केंद्रावर थांबले होते. यादरम्यान त्यांना चक्कर आली अन् ते खाली पडले. त्यानंतर त्यांना बीड शहरातील काकू नाना हॉस्पिटलमध्ये दाखल करण्यात आलं. तिथून त्यांना छत्रपती संभाजीनगर येथील रुग्णालयात देखील दाखल करण्यात आलं. मात्र डॉक्टरांनी त्यांना मयत घोषित केलं. या दुर्दैवी घटनेने बीड शहरासह जिल्ह्यामध्ये हळहळ व्यक्त केली जात आहे.
