Chhatrapati Sambhajinagar Accident News : छत्रपती संभाजीनगरमध्ये दोन दुचाकीची समोरा-समोर जोरदार धडक होऊन भीषण अपघात घडला आहे. जिल्ह्यातील करमाड- पिंप्रिराजा मार्गावरील मंगरूळ शिवारात हा अपघात झाला आहे. करमाड- पिंप्रिराजा मार्गावर दोन दुचाकीची समोरा-समोर जोरदार धडक होऊन दुचाकीवरील चार जण रस्त्यावर फेकले गेले. त्याचवेळी अज्ञात वाहन त्यांच्या अंगावरून गेल्याने तीन जणांचा चिरडून जागीच मृत्यू झाला. तर एक जण गंभीर जखमी झाला आहे.
हा भीषण अपघात संभाजीनगर जिल्ह्यातील करमाड-पिंप्रिराजा मार्गावर मंगरूळ शिवारात घडला आहे. आकाश शिवाजी कांबळे(वय२६), कैलास एकनाथ कांबळे (वय४२, दोघे,रा. सांजखेडा,ता. छत्रपती संभाजीनगर) आणि प्रताप साळुबा बनसोडे (वय४०,रा. पिंप्रिराजा,ता. छत्रपती संभाजीनगर) असे मृताचे नावे आहेत. तर शंकर लक्ष्मण थोरात (रा. नागेवाडी,ता. जालना) असे जखमी झालेल्या व्यक्तीचे नाव आहे.
मिळालेल्या अधिक माहितीनुसार, शंकर थोरात हे करमाड- पिंप्रिराजा मार्गाने दुचाकी वरून करमाडकडे येत होते. तर आकाश कांबळे हे शेंद्रा डीएमआयसीतून आपले काम आटोपून दुचाकीवरून ट्रिपलसीट करमाडहून पिंप्रिराजा मार्गे सांजखेडा येथे जात होते. शनिवारी सायंकाळी साडेसहा वाजता मंगरूळ शिवारात दोन्ही दुचाकींची समोरा-समोर जोरदार धडक झाली
या धडकेमुळे दोन दुचाकीवरील चार जण रस्त्यावर फेकले गेले. याचवेळी या मार्गावरून जाणाऱ्या एक अज्ञात वाहन तिघांच्या अंगावरून गेले. रस्त्यावर अक्षरशः रक्ताचा सडा पाहून येणारे जाणारे हळहळ व्यक्त करत होते. करमाड पोलिसांना अपघाताची माहिती मिळताच घटनास्थळी सहायक पोलीस निरीक्षक प्रताप नवघरे, विजय जारवाल, विनोद खिल्लारे, शकुल बनकर यांनी घटनास्थळी जाऊन जखमींना रुग्णवाहिकेतून रुग्णालयात दाखल केले.
