बीड : जिल्ह्यात गुन्हेगारीच्या घटनांमध्ये सातत्याने वाढ असून आताही एका तरुणाला जीव गमवावा लागला आहे. अंबाजोगाईमधील पोखरी रोडवर एका तरुणावर दोन जणांनी कोयत्याने वार करून त्याची हत्या केल्याची घटना घडली आहे. या हल्ल्यामध्ये जखमी झालेल्या सदर तरुणाचा उपचारादरम्यान झालेल्या मृत्यू झाला. राजकुमार करडे असे मृत्यूमुखी पडलेल्या तरुणाचे नाव आहे. या घटनेने अंबाजोगाई तालुक्यात एकच खळबळ उडाली आहे.
मिळालेल्या माहितीनुसार, राजकुमार करडेवर पोखरी रोडवरील सारडा नगरी जवळ दोन तरुणांनी धारदार शस्त्रांनी हल्ला केला. त्याच्या गळ्यावर, डोक्यात आणि पाठीवर सपासप वार करण्यात आले. या हल्ल्यात करडे गंभीर जखमी झाला. त्याच्यावर एका खासगी रुग्णालयात उपचार सुरू होते. मात्र, डॉक्टरांनी शर्थीचे प्रयत्न करूनही अतिरक्तस्त्राव झाल्यामुळे राजकुमारचा उपचारादरम्यान मृत्यू झाला.
दरम्यान, हा हल्ला कोणी केला आणि त्यामागचे कारण हे अद्याप समजू शकलेले नाही. या प्रकरणी अंबाजोगाई शहर पोलिस ठाण्यात गुन्हा नोंद करण्यात आला आहे. पुढील तपास पोलिस करत आहेत.
