छत्रपती संभाजीनगर : रात्री पायी घराकडे जाणाऱ्या तरुणाला लुटणाऱ्या रिक्षाचालकासह दोघांना सिडको पोलिसांनी अटक केली आहे. अभिजित चंद्रकांत चौथमल (२९, सिडको एन-९) हे १५ मे रोजी रात्री बारा वाजेच्या सुमारास सिडकोतील रामेश्वर मेडीकलजवळ आले असता तेथे एक रिक्षा त्यांच्याजवळ येवून थांबली. रिक्षाचालक व त्यातील दोघे जण खाली उतरले व त्यांनी अभिजितला अडवून शिवीगाळ करत मारहाण केली. तसेच त्याच्याकडील पाकिट व मोबाइल हिसकावून घेत पळ काढला होता. याप्रकरणी सिडको पोलीस ठाण्यात गुन्हा दाखल करण्यात आला होता. या प्रकरणातील आरोपी शिवम उर्फ जावेद राहुल भिवसणे (१९, रा. शास्त्रीनगर, एन ७, सिडको), गौरव उर्फ बांग्या विजय मोकळे (२०, रा. टॉवर गल्ली, आंबेडकरनगर) या दोघांना पोलिसांनी २६ मे रोजी अटक केली. त्यांच्याकडून १८ हजारांचा मोबाइल, ८०० रुपये रोख रक्कम आणि गुन्ह्यात वापरलेली ८० हजारांची रिक्षा असा मुद्देमाल जप्त केल्याची माहिती पोलीस निरीक्षक अतुल येरमे यांनी दिली आहे.
आरोपी हे टीव्ही सेंटर येथील डे नाईट ग्राऊंडवर आल्याची माहिती पोलिसांना मिळाली होती. पोलिसांनी तिथे जावून दोघांना ताब्यात घेत विचारपूस केली असता, त्यांनी गुन्ह्याची कबुली दिली. या गुन्ह्याचा तपास उपनिरीक्षक प्रमोद देवकते, सहाय्यक फौजदार सुभाष शेवाळे, हवालदार मंगेश पवार, प्रदिप दंडवते, लाला पठाण, अंमलदार सहदेव साबळे, विशाल सोनवणे आदींच्या पथकाने केली.
