लातूर : लातूर जिल्ह्यात अज्ञातांनी मुक्कामी बस पेटवल्याची घटना घडली आहे. बस का पेटवली याचे कारण अद्याप समोर आले नाही. उमरदरा या गावात ही जाळपोळीची घटना घडली. मुक्कामाची बस अज्ञातांनी जाळली. काल मध्यरात्रीनंतर अज्ञातांनी ही बस पेटवून दिली. यावेळी बसमध्ये वाहक आणि चालक झोपले होते. बस पेटवल्याचे कळताच त्यांनी कसाबसा स्वतःचा जीव वाचवला. या घटनेत सुदैवाने जीवितहानी टळली.
लातूर जिल्ह्यातील उंबरदरा हे गाव जळकोट तालुक्यातील गाव आहे. दररोज मुक्कामाची बस साडेनऊ ते दहाच्या दरम्यान दाखल होत असते. रविवारी ही बस गावाजवळ आल्यानंतर थांबली. गाव जवळ असल्या कारणाने प्रवासी उतरून घराकडे निघून गेले. वाहक आणि चालकांनी बस थांबल्याची माहिती उदगीर आगाराला कळवली होती.
या आगीत संपूर्ण बस जळून खाक झाली आहे. ही बस पेटवण्याचं नेमकं कारण काय? कोणी पेटवली? याबाबत कोणतीही माहिती अजून समोर आली नाही. पोलीस या घटनेचा तपास करत आहेत. दरम्यान, बसमध्ये शॉर्ट सर्किट झाला असावा असा अंदाज व्यक्त केला जात आहे.
