पुणे : मुंबईमधील आठ महिला पोलीस हवालदारांवर त्यांच्याच वरिष्ठांनी सातत्याने बलात्कार केल्याची घटना नुकतीच उघडकीला आल्याने एकच खळबल उडाली आहे. विश्वास ठेवावा आसा रक्षकच भक्षक होतो, तेव्हा न्याय कोणाकडे मागायचा, असा प्रश्न उपस्थित होतो. पुण्यात नुकतीच अशीच खळबळजनक घटना उघडकीला आली आहे. सावत्र वडिलांनी आपल्या दहा वर्षांच्या अल्पवयीन मुलीवर बलात्कार केल्याची धक्कादायक घटना घडली आहे. हा प्रकार दांडेकर पुल परिसरात रविवारी (ता. ७) दुपारी दीड ते पावणे दोन वाजण्याच्या सुमारास घडला. याप्रकरणी पोलिसांनी नराधम वडिलांवर बलात्कार व पोक्सो कायद्यांतर्गत गुन्हा दाखल करुन, अटक केली आहे.
याबाबत पीडित मुलीच्या आईने (वय २७) पर्वती पोलीस ठाण्यात फिर्याद दिली आहे. त्यानुसार, पोलिसांनी सावत्र वडिलांवर पोक्सो कायद्यांतर्गत गुन्हा दाखल करुन अटक केली. याप्रकरणी पोलिसांनी दिलेल्या माहितीनुसार, फिर्यादी महिला आणि आरोपी हे पती-पत्नी असून, आरोपी हा तिचा दुसरा पती आहे. या महिलेला पहिल्या पतीपासून दहा वर्षांची मुलगी आहे. ही मुलगी घरामध्ये एकटी असताना सावत्र वडिलांनी स्वत:चे कपडे काढून मुलीशी जबरदस्ती केली. तसेच त्याने सांगितल्याप्रमाणे कृत्य करण्यास नकार दिल्याने आरोपीने मुलीला हाताने पाठीत व तोंडावर मारहाण केली, अशी फिर्याद संबंधित महिलने दिली आहे.
दरम्यान, सावत्र वडिलांनी असे कृत्य केल्यानंतर पीडित मुलीने तिच्यासोबत घडलेला प्रकार आईला सांगितला. आईने मुलीसह पर्वती पोलीस ठाण्यात धाव घेतली. महिलेच्या तक्रारीचे गांभीर्य लक्षात घेऊन पोलिसांनी तत्काळ गुन्हा दाखल करुन आरोपीला अटक केली आहे.
या घटनेचा पुढील तपास महिला पोलीस उपनिरीक्षक जाधव करीत आहेत.
