नांदेड : नांदेडमधून धक्कादायक घटना समोर आली आहे. येथे संपत्तीच्या वादातून धाकट्या भावाने आपल्या सख्ख्या थोरल्या भावाची धारदार शस्त्राने वार करत हत्या केल्याची घटना समोर आली आहे. सुनील प्रल्हाद लाखे असे हत्या झालेल्या थोरल्या भावाचे नाव आहे तर नागेश प्रल्हाद लाखे असे आरोपी असलेल्या धाकट्या भावाचे नाव आहे. ही घटना बिलोली गावात घडली असून, या घटनेनंतर पोलिसांनी तात्काळ कारवाई करत आरोपी भावाला अटक केली आहे. या धक्कादायक घटनेनंतर परिसरात खळबळ उडाली आहे.
मिळालेल्या माहितीनुसार, नागेशने आपला मोठा भाऊ सुनीलचा खून केल्यानंतर ‘माझ्या भावाला कुणीतरी मारलं’ अशी खोटी माहिती पोलिसांना देऊन त्यांची दिशाभूल करण्याचा प्रयत्न केला होता. मात्र, पोलिसांनी तपासाचे चक्र फिरवत खुनाचा उलगडा केला आहे. या प्रकरणी मयत सुनीलचे नातेवाईक कुणीही पुढाकार घेऊन तक्रार दाखल करत नसल्यामुळे, पोलीस उपनिरीक्षक शिवराज लोखंडे यांच्या तक्रारीवरून नागेश लाखे याच्याविरूद्ध खुनाचा गुन्हा दाखल करण्यात आला आहे.
बिलोली पोलिसांनी तत्काळ कारवाई करत आरोपीला अटक केली केली आहे. अधिक तपास पोलीस करीत आहेत.
