बीड: गेवराई तालुक्यातून एक अत्यंत धक्कादायक आणि हृदय पिळवटून टाकणारी घटना समोर आली आहे. प्रेमप्रकरणातून एका मित्रानेच आपल्या काही साथीदारांच्या मदतीने आपल्याच मित्राची निर्घृण हत्या केली आहे. ही घटना गेवराई तालुक्यातील गंगावाडी गावात घडली असून, या प्रकरणी तलवाडा पोलीस ठाण्यात पाच जणांविरोधात खुनाचा गुन्हा दाखल करण्यात आला आहे.
नेमकं काय घडलं?
मृत्यू झालेल्या तरुणाचे नाव शिवम चिकणे (वय अंदाजे २०-२२) असून, तो माजलगाव येथे इंजिनिअरिंगचे शिक्षण घेत होता. मिळालेल्या माहितीनुसार, शिवमचे गावातील एका मित्राच्या बहिणीसोबत प्रेमसंबंध होते. मागील काही दिवसांपासून त्यांचे हे प्रेमप्रकरण सुरू होते.
अलीकडेच, मुलीचा भाऊ आणि शिवमचा मित्र असलेला आरोपी शिवम यादव याला त्यांच्या प्रेमसंबंधांची माहिती मिळाली. यामुळे तो प्रचंड संतापला. रागाच्या भरात त्याने आपल्याच मित्राचा काटा काढण्याचा कट रचला. त्याने आपले इतर चार साथीदार सत्यम मांगले, गणेश यादव, राजाभाऊ यादव आणि ईश्वर यादव यांच्या मदतीने शिवमला जबर मारहाण केली.
क्रूर मारहाण आणि मृत्यू
शुक्रवारी, मुलीच्या भावाने साथीदारांसह शिवम चिकणेला गाठले आणि त्याला बेदम मारहाण केली. ही मारहाण इतकी अमानुष होती की, शिवम गंभीर जखमी झाला. त्याला तात्काळ स्थानिक रुग्णालयात उपचारासाठी दाखल करण्यात आले. मात्र, त्याची प्रकृती चिंताजनक असल्याने डॉक्टरांनी त्याला छत्रपती संभाजीनगर येथे हलवण्याचा सल्ला दिला. दुर्देवाने, छत्रपती संभाजीनगरला घेऊन जात असतानाच वाटेत शिवमने अखेरचा श्वास घेतला आणि त्याचा दुर्दैवी मृत्यू झाला.
या प्रकरणी, मृत शिवमचे वडील काशिनाथ चिकणे यांनी तलवाडा पोलीस ठाण्यात तक्रार दाखल केली आहे. पोलिसांनी शिवम यादवसह इतर चार आरोपींविरोधात खुनाचा गुन्हा दाखल केला आहे. घटनेनंतर सर्व आरोपी फरार झाले असून, तलवाडा पोलीस त्यांचा कसून शोध घेत आहेत. प्रेमप्रकरणातून घडलेल्या या हत्येमुळे गेवराई तालुक्यात, विशेषतः गंगावाडी गावात, भीती आणि चिंतेचे वातावरण पसरले आहे.
