छत्रपती संभाजीनगर : छत्रपती संभाजीनगरच्या खवड्या डोंगरावरील कुणाल चांदगुडे आणि त्याच्या आई-वडिलांच्या मृत्यू प्रकरणात तपास जसजसा पुढे जात आहे, तसतसे नवे आरोप आणि धक्कादायक माहिती समोर येत आहे. या प्रकरणात पोलिसांनी चांदगुडे कुटुंबीयांच्या घराचा पंचनामा करून तपास सुरू केला आहे. त्याचदरम्यान कुणालच्या आत्याने कौटुंबिक वादासंदर्भात गंभीर आरोप केले आहेत.
कुणालची आत्या शोभा यांच्या म्हणण्यानुसार, त्यांचा भाऊ मुरलीधर चांदगुडे यांच्याशी कुटुंबाचा जवळपास 25 वर्षे संपर्क नव्हता. मात्र, गेल्या चार महिन्यांपासून मुरलीधर पुन्हा त्यांच्या कुटुंबीयांशी बोलू लागले होते. मात्र, त्यांना कुटुंबीयांपासून दूर ठेवण्यात आले आणि अखेर घराबाहेर काढण्यात आल्याचा आरोप शोभा यांनी केला आहे.
मुरलीधर आणि त्यांची पत्नी संगिता यांच्यात काही महिन्यांपूर्वीपर्यंत संबंध चांगले होते, असेही शोभा यांनी सांगितले. सुमारे चार महिन्यांपूर्वी मुरलीधर एका नातेवाईकाच्या मुलाच्या लग्नासाठी गेले होते. मात्र, संगिता लग्नाला गेल्या नव्हत्या. लग्नाचा कार्यक्रम संपल्यानंतर मुरलीधर घरी परतणार होते. मात्र, त्याच काळात त्यांच्या बहिणीच्या मुलाचे निधन झाले. त्यामुळे ते त्या ठिकाणी आणखी काही दिवस थांबले.
नातेवाईकाच्या मृत्यूनंतर दहाव्याचा विधी पूर्ण करूनच मुरलीधर परतणार असल्याचे त्यांनी सांगितल्याने संगिता नाराज झाल्याचा आरोप आहे. याच मुद्द्यावरून दोघांमध्ये वाद झाल्याचे शोभा यांनी म्हटले आहे. मुरलीधर यांना गावी राहणे पसंत होते, मात्र ही बाब संगिता यांना मान्य नव्हती. त्यामुळे दोघांमध्ये वारंवार खटके उडत होते आणि अखेर मुरलीधर यांना घराबाहेर काढण्यात आल्याचा आरोप करण्यात आला आहे.
“आमच्या भावाला संगिताने आम्हाला बोलू दिले नाही. 25 वर्षांनंतर तो गेल्या चार महिन्यांपासून आमच्याशी बोलत होता. मात्र, त्याला घराबाहेर काढण्यात आले,” असा दावा शोभा यांनी केला आहे.
दरम्यान, संगिता यांच्या बहिणीनेही या प्रकरणावर प्रतिक्रिया देताना गंभीर सवाल उपस्थित केले आहेत. पल्लवी जऱ्हाड यांनी कुटुंबाला या दुःखातून सावरण्यासाठी थोडा वेळ द्यावा, अशी विनंती केली. त्याचवेळी सुमारे 20 वर्षांपूर्वी मुलाने गाव आणि शेती सोडावी यासाठी त्याच्या डोक्यात फावडे का मारण्यात आले होते, असा सवाल त्यांनी उपस्थित केला.
या परस्परविरोधी आरोपांमुळे खवड्या डोंगरावरील तिघांच्या मृत्यूचे गूढ आणखी वाढले आहे. पोलिसांकडून घराचा पंचनामा, घटनास्थळावरील पुरावे आणि कुटुंबीयांच्या जबाबांच्या आधारे तपास सुरू आहे. या सर्व आरोपांची सत्यता तपासानंतरच स्पष्ट होणार असून, मृत्यूमागील नेमके कारण शोधण्यासाठी पोलीस विविध शक्यता तपासत आहेत.
